سعاد زرار كود كازا ///
بطل الجيدو العالمي الفرنسي تيدي رينر جا باش يولي طاشرون فالمغرب وحصل. عندو مشروع “134 سكوير” فطريق دار بوعزة ضواحي كازا.
حسب شهادة ل”كود” فهاد المشروع كان من المفروض يسالي والناس للي شراو يتسلمو شققهم فيونيو 2022. المشروع للي تكلفات “انجاز” بتوسيقو كوميرسيالمون تعطل بزاف.
وفق شهادة ل”كود” فاخر دجنبر 2023 تلاقى تيدي رينر مع اللي شراو واعتاذر على التأخير ووعدهم يتسلمو شققهم فاول عام 2024. دابا دازت 3 اشهر ونص من هاد العام وما تسلمو والو” يقول مصدر “كود”.
دابا المشروع عندو مشكلة فبيرمي دابيتي. يمكن واقعة مشاكل لمشاريع هاد البطل العالمي فالمغرب.
حسب مصدر “كود” للي شرا فالبلان٬ وصل للطرانش 4 اي خاصو غير يقولو ليه جي تخلص بشرط يسلموه شقتو. يعني خلصو 3 طرنشات لشقق كتبدا بمليون و800 الف درهم وكتوصل حتى 3 مليون ونص.
تيدي رينر بطل الجيدو اللي ربح 10 ميداليات فبطولة العالم. ما عمر شي بطل وصل لهاد الشي. ربح جوج ميداليات ذهبية اولمبية وكيوجد يدافع علي الثالثة فباريس. عزيز عليه المغرب. ديما فمراكش. دابا قلبها طاشرون فكازا. هنا لحد الان خاسر. فاشل يسلم للزبناء شققهم.
دابا حتى موقع “134 سكوير”.ما” واقف. باقية غير الصفحة فالفايس. باينة كاينة شي مشكلة فشي شكل
