عفراء علوي محمدي- كود//

فردها على بلاغ مندوبية السجون الأخير، اللي اتهمتها فيه بعدم إقناع زوجها بوقف إضرابو على الماكلة، قالت خلود المختاري، مرات الصحفي المعتقل سليمان الريسوني، أنها كتطالب إدارة السجن باش تخرج التسجيلات ديال الزيارة، وشنو دار بينها وبين الريسوني، وتعرضو على الرأي العام.

وزادت المختاري، فتصريحها ل”كود”، كتقول: “غير يخرجو كَاع داكشي اللي عندهم، ماعندناش مشكل، ويعرضو تسجيلات اللقاء على الجميع، إلى كانو كيسجلونا…”

وكذلك طالبات المختاري بتسريب الفيديوهات اللي كانت تكلمات عليهم إدارة السجن، واللي قالو كتبين أن الريسوني فحالة صحية جيدة، ويخرجوها لعموم الشعب المغربي.

وفردها على تدوينة سابقة لمرات الريسوني، قالت مندوبية السجون أنه فإطار مراقبتها للزيارات العائلية طبقا للمادة 77 من القانون 23/98 المتعلق بتنظيم وتسيير المؤسسات السجنية، فالمختاري ماحاولاتش تقنع راجلها بتوقيف الإضراب على الطعام.

وكانت علنات مرات الريسوني، فتدوينة ليها، انها زارتو فالحبس، وأنه طيح بزاف من الوزن ديالو، وقالت أنه مابغاش يحبس إضرابو واخا حاولات تقنعو.

وقالت أن الريسوني خرج من قاعة الزيارة وهو كيقول ليها: “غنخرج من الحبس للمقبرة مرتاحا، وغنتلاقاو أنا وانت وهاشم هناك”.

https://m.facebook.com/story.php?story_fbid=952838945517658&id=100023746840914