عفراء علوي محمدي- كود//

المحكمة الابتدائية فالرباط غادي تنظر، اليوم الاربعاء 28 ابريل، فشكاية استعجالية حطها محمد الكصي، المحامي بهيئة الرباط، دعى من خلالها الشركة الوطنية للإذاعة والتلفزة بسباب سلسلة “قهوة نص نص” اللي كتدوزها القناة الأولى بعد الفطور مع السبعة وربع.

وفشكايتو، اللي حصلات “كود” على نسخة منها، قال المحامي أن السلسلة “كتضمن عدة مشاهد تسيء لسمعة مهنة المحاماة، بإظهار إحدى الممثلات المسماة “بديعة الصنهاجي” وهي لابسة بذلة المهنة فالقهوة وكتسول الزبائن والموكلين، وشي مرات كتعطي استشارات قانونية فالقهوة النيت وكتعطي ليكارت فيزيت”.

وقال الكصي، اللي كينوب عليه فهذ الملف عمر الداودي، المحامي بهيئة نفس المدينة، أن المخرج “بغا ينقص من دور المحامي فاداء مهام الدفاع فإطار القانون ومكانتو الاعتبارية”، والتمس أمر المدعي بإيقاف بث السلسلة، تحت طائلة غرامة تهديدية ديال 100 ألف درهم على كل يزم تأخير فالتنفيذ.

فتعليقو على هذ الشكاية، قال الناقد السينمائي والتلفزي، أحمد السجلماسي، ان هذ الفكرة ديال رفع الدعاوي على المنتجين والمخرجين بسبب شخصيات ما فاعمال ما هي فكرة مغلوطة، “لان هذشي شخصيات تخييلية إبداعية وفنية ماعندهاش علاقة بالواقع”.

وزاد، فتصريحو ل”كود”، أن المحامي كيمارس مهنتو فالواقع، كيف الطبيب أو غيرو، اما فالسيتكومات او المسلسلات “هذو شخصيات متخيلة، ومن حق المخرج او كاتب السيناريو يتخيلها بالطريقة اللي بغا وبالشكل اللي كيشوفو هو، بغرض الإضحاك أو الترفيه، وهذشي مافيهش إساءة”، على حساب هضرتو.

واعتبر اننا إلى فتحنا هذ الباب، غايوليو الشكايات يكثرو بسباب هذشي، وكل واحد فمهنة ما غيولي يدعي القنوات او شركات الإنتاج حيت تناول عمل ما المهنة ديالو، وهكذا “ماغنساليوش”.

وقال السجلماسي أن هذشي بغض النظر على جودة السلسلة، وواش كيتضمن محتوى بجودة مزيانة أو لا، حيت شنو ما كان يكون العمل من حق الفنان يتخيل الشخصيات لي بغا.

وكشف أن مصر سابقانا لهذ القضية دالشكايات، بحيث بحكم صناعتها السينمائية والتلفزيونية القوية، “كنلاحظو سنويا محامين وقضاة وجهات كترفع دعاوى عاى الانتاجات، بحجة ان الشخصيات اللي كاينة فهذ الاعمال كتسيء لمهن لا، وهذشي ماشي معقول”، حسب هضرتو.