كريم الشركي – كود///

تسببت اللائحة ديال ال300 مغربي اللي خرجوا هاد الصباح من سبتة، فضجة اعلامية، بعدما سولات الصحافة الاسبانية مندوبية الحكومة على شكون دار هاد اللائحة، وأش هي المعايير اللي داروها لاختيار اللي غايخرجو.

مندوبية الحكومة باش تبعد عليها الصداع، خوفا من تكرار سيناريو مليلية اللي خرجوا منها ناس ماشي عالقين وعندهوم أوراق الاقامة فالمدينة المحتلة، قالت أنها مادارت حتى لائحة وماعارفة والو، واللي بغى يعرف شكون دارها يمشي يسول السلطات المغربية، حقاش هي اللي سلماتنا اللائحة.

وكانت ضجة اثيرت حول العالقين فمليلية اللي خرجو قبل اسبوع، بعدما جرى اتهام الناس اللي دارو هاد اللائحة بأنهم خرجو عائلاتهم وصحابهم، وخلاو الناس اللي يستاحقو يخرجو حقاش كيباتو فالشوارع.

وكانت الاتهامات الموجهة للمسؤولين قالت أن خمسين شخص فقط من أصل 200 اللي خرجوا من مليلية، هوما اللي كانوا كيباتو فمراكز الايواء فمليلية، بينما البقية كانوا كينعسو اما فديورهوم او تماك، او عند عائلاتهم وصحابهم.