محمد سقراط-كود///

في 2003 ناضت الدولة المغربية شدات شباب في مقتبل العمر بتهمة ديال محاكم التفتيش والقرون الوسطى ألا وهي عبدة الشيطان، شباب كانوا كيلبسو الكحل بحال جوني كاش والمورفين واخا كاع ممساليا ليهم لاكارط وكيتصنتوا موسيقى الهارد روك وكيجمعوا في واحد القهوة، فرقوا عليهم بين شهر وعام دالحبس خرجوا من بعد ولكن كانت حياتهم توصمات، في هاد الوقت بالظبط كانوا السلفيين المتطرفين جامعين التخليطة ديال القنبول وكيتسناو غير الفرصة باش يفجروا كازا ويحولوا المغرب لحمام دم بلدي، ومن ورا إعتقال شباب الهارد الروك بشهورة قلال غادي توقع أحداث 16 ماي الدموية ولي جرحها لم يندمل لحد الآن، وطبعا واخا الدولة تنادم معاها الحال وبدات تدير المهرجانات وخرج البولفار وموازين جابو أباطرة الروك لمنصة السويسي بحال سكوربيون وديب بيربل وحتى بلاسيبو إلا أن التشدد كان تغلغل في المجتمع وفات الفوت وبقات مستمرة العمليات الإرهابية من داك الوقت حتى ليومنا هذا وآخرها إغتيال شرطي حي الرحمة، وبزاف منهم تشدو قبل مايبداو في العمليات ولكن مرة مرة كيفلت شي واحد منهم.

ولكن للأسف على ما يبدو أن الدولة لم تتعض وهاهي كتعاود توفر نفس الظروف للتشدد والإرهاب باش ينمو ويترعرع ويخرجو من الإعشاش ديالهم، ماركس يقول أن “التاريخ يكرر نفسه مرتين اللولة على شكل تراجيدية والتانية على شكل مهزلة”، التراجيدية والمأساة والغدر والقتل والإرهاب والترهيب راه وقع في سطاش ماي و ما تبعها من أحداث، والمهزلة هي ما سيقع مستقبلا مادام أن الدولة مخلية المتطرفين يصولون ويجولون وبنت لابسة ميني قصير راه كالسة تحقق معاها،ومانعاها من  أنها ترجع لبلادها التانية ، بحال الى الدولة ماعرفاش الخطر الحقيقي فين كاين، وماعارفاش شكون كيهدد أمن المغاربة وسلامتهم وعقيدتهم، وماعرفاش شكون لي خلى شباب مغاربة أميين يذبحوا بأبشع طريقة جوج سائحات آمنات في بلاد الأمن والأمان .

واش العالم غادي للقدام والمغرب راجع اللور، دولة بحال السعودية معقل التطرف والتشدد والسلفية وأصل الوهابية تخلات على هادشي كامل ودايرة سهرات لميتاليكا والفنانين العالميين وسط الرياض وكنشوفوا ديناميكية المجتمع ديالهم كيفاش غادا كتغير بسرعة، بينما المغرب غادي مكسيري بالمارشآريير، العيالات حققوا مكتسبات وحريات غادا كتسلب منهم وحدة مور وحدة، على أي أساس يتم متابعة بنت لابسة صاية قصيرة في برنامج على اليوتوب ماشي في التلفازة الوطنية، وقبل منها إعتقال جوج روابا دارو أغنية ناجحة كولشي ناشط بيها، فين غادا هاد البلاد حتى تولي غير فترة الألفينات لي كانت مزيرة الوقت تولي تبان دابا العصر الذهبي للحريات مقارنة مع المتابعات والإدانات لي كيوقعوا حاليا.