كود الرباط//

ليوم، قيادات من الصف الأول فحزب الاستقلال دايرة عشا فدار القطب الصحراوي حمدي ولد الرشيد فالرباط. على طاولة العشا، قضايا كبيرة غادية تشعل مزيد من الصراعات، قبل وأثناء وبعد المؤتمر 18 للحزب للي غا يتعقد من هنا شهر، وأيضا قبل إجتماع حاسم للجنة التنفيذية للحزب للي غادي يتعقد غدا.

القضية الاولى: هي للي معروفة ب “قضية مضيان-رفيعة”. المفاوضات وصلات للباب المسدود وفشلات جميع المحاولات باش تتراجع رفيعة المنصوري عن شكايتها المقدمة ضد نور الدين مضيان أمام القضاء. قيادات حزب الاستقلال قامت بضغوطات على رفيعة المنصوري باش تسحب الشكاية ديالها، وهناك من اعتبر أن هاد الضغوطات هي عنف آخر يمارس على رفيعة لأغراض حزبية وسياسوية على حساب كرامة وحقوق رفيعة المنصوري وعائلتها.

على هاد الاساس، وحسب مصدر استقلالي رفيع، لعشا ديال اليوم غادي يطوي صفحة هاد الملف المعروض على القضاء، وغادي يطوي معاه صفحة نور الدين مضيان للي كان شبه محسوم الاستوزار ديالو فالتعديل المقبل. هاد الأخير، بطبيعة الحال، ما غاديش يهضم هاد الضربة القاتلة للي توجهات ليه من قبل “تيار طنجة” وهرسات لاكاريير بوليتيك ديالو كاملة. هاد الشي غادي يزيد يشعل صراعات أقوى داخل حزب الميزان بإخراج ملفات وملفات مضادة.

القضية الثانية: ها نور الدين مضيان مشا، شكون غادي ياخذ بلاصتو فرئاسة الفريق الاستقلالي فمجلس النواب فتجديد الهياكل للي غا تكون مع افتتاح الدورة الربيعية فأبريل الجاي؟ ثلاثة أسماء كتصارع على المنصب. الأول، عمر حجيرة، النائب عن وجدة، وللي سبق ليه ترأس الفريق لمدة فالوقت للي كان مضيان كيجري باش يعاود الانتخاب ديالو بعد إسقاط العضوية ديالو فالمجلس من قبل المحكمة الدستورية. لكن عمر حجيرة هو رئيس جهة الشرق حاليا بعد اعتقال الرئيس السابق عبد النبي بيوي. هادي، حزب الاستقلال لقا ليها تخريجة.

المتنافس الثاني على المنصب هي خديجة الزومي، لكن الزومي بغات توللي وزيرة واخا عندها شبهات فالعديد من القضايا وأيضا بسبب سنها للي تجاوز 65 سنة. الزومي كان دورها كنائبة رئيس مجلس النواب هزيل جدا وهاد الشي علاش قيادة الحزب كتفكر أنها تحيلها على التقاعد السياسي وتكلفها بمنظمة المرأة الاستقلالية فقط.

المرشح الثالث هو عبد الصمد قيوح للي ماشي غرضو بالصح يكون رئيس الفريق بقدرما كيمارس ضغط على نزار بركة من أجل استوزاره وإلا غادي يرجع للفريق ويرجع أيضا للتحالف السابق بينو وبين حمدي ولد الرشيد وغادي يخلق مشاكل للأمين العام نزار بركة. رئاسة الفريق إذن غادية تشعل العافية وقيادة الحزب قررات، حسب المصدر الرفيع، أنها تعطيها لعمر حجيرة بالنيابة حاليا، وبعد المؤتمر المقبل، يترسم فيها بشكل نهائي بعدما يقدم استقالتو من رئاسة مجلس جهة الشرق ويسلمها لقيادي فالبام. هاد القرار غادي يترسم غدا فاللجنة التنفيذية، وغادية تبدا معاه صراعات أخرى.

القضية الثالثة: هي بطبيعة الحال مرتابطة بالتعديل الحكومي. من الأحزاب كلها ديال الاغلبية، حزب الاستقلال هو للي كيعيش غليان كبير بسبب هاد القضية. المرشحين كثار وكولشي بغا يوللي وزير ولا يشعل العافية. ها سيدي حمدي ولد الرشيد، رئيس جهة العيون الساقية الحمراء، ها عبد الصمد قيوح، منسق الحزب فسوس، ها فؤاد قادري، منسق الحزب فالدار البيضاء، ها كنزة الغالي، سفيرة المغرب فالشيلي، ها محمد زيدوح، القيادي فالرباط، ها عبد القادر لكيحل، ها عبد الواحد الانصاري، وها نور الدين مضيان، وها مجموعة أسماء، يقول المصدر، مخبيها الأمين العام للحزب وممكن تتسبب فحالة استوزارها فانفجار الأوضاع داخل الحزب وإشعال عافية كبيرة.

إطفاء هاد العوافي كلها مرتابط بمدى قدرة نزار بركة فقيادة الحزب للي كيبان أنه أصبح تحت رحمة لوبيات وتيارات وجماعات الضغط المصلحية. هادشي علاش أصبح القطب الصحراوي حمدي ولد الرشيد هو صاحب الحل والعقد الحقيقي فالحزب، وهاد الشي علاش داير لعشا ليوم فدارو باش يبان بللي هو، وماشي نزار بركة، للي قادر يرجع الهدوء للحزب ويطفي هاد العوافي كلها للي قريب تشعل فيه وللي هي أخطر من موقعة “الطباسل” للي وقعات ف 2017 وكتهدد حتى الأغلبية الحكومية ديال عزيز أخنوش.