كود كازا ///

أعلنت لجنة البرمجة هاد النهار على التواريخ ديال المباريات المؤجلة عن دور ثمن نهائي كأس العرش، ولغادي تجمع الرجاء مع الفتح، والوداد مع بركان ذهابا وإيابا، ودارتهم في التاريخ للمنتخب المحلي باغي ادير التجمع التدريبي ديالو.

اللجنة بمجرد معلنات على التواريخ حتى ترونات القضية في الجامعة وتحركات الهواتف، بين أعضاء المنتخب المحلي، وأعضاء الإدارة التقنية خصوصا أن المنتخب المحلي كيوجد للبطولة الإفريقية للمنتخبات المحلية، ودار المعسكر في تاريخ ديال الاتحاد الدولي.

ودابا غادي اكون ضروري على الإدارة التقنية أنها تلقى حل مع لجنة البرمجة لأن التواريخ إلى تلعبو فيهم الماتشات هذا كيعني أن المنتخب المحلي مغاديش ادير المعسكر ديالو وغادي اضيع فرصة كبيرة باش اوجد للنهائيات ديال الشان.

وكان سلامي قد شهر تقريبا عطى للإدارة التقنية البرنامج ديال المعيكر لغادي اكون من فاتح أكتوبر إلى 10 أكتوبر، ولكن البرمجة محتارماتش المواعيد ودارت شغل إديها وبرمجات متشات في 3 و5 و8 أكتوبر.

وغادي تلقى اللجنة المذكورة مشكل آخر هو أن سلامي اقدر اعيط على ثلاثة لاعبين من كل فريق، وغادي اكون من حف لفراقي أنهم اطالبوا بتأجيل المباريات، لأن القانون كيقول أي فريق عندو ثلاثة ديال اللاعبين في المنتخب كتأجل المباريات ديالو.