سهام البارودي – كود//
مؤخرا نايضة ضجة على اتفاقية التبادل التجاري لي كاينة بين المغرب و تركيا ! الضجة لي كان فيها تهديد بالغاء الاتفاقية من الطرف المغربي قبل ماتقبل تركيا بأنها تراجع بنود الاتفاقية مع المغرب !
من الحوايج لي بانو فخضم هاد الصراع بين المغرب و تركيا هوا فرحة بعض البقالة فوسائل التواصل الاجتماعي بخبر ” اقفال محلات بيم” الخبر لي ماشي صحيح بطبيعة الحال و لكن حيت هوما كايشوفو بيم فيه تهديد للبقال المغربي طبعا غايفرحو و غايساينوه يسد ! و لكن السؤال لي خاصنا نطرحوه على راسنا هوا واش بهاد الطريقة هادي غادي نقذوا الاقتصاد الوطني ؟ واش لاسدينا على راسنا من تركيا و سدينا بيم و منعنا المنافسة بهاد الطريقة غادي نقذوا الاقتصاد ؟
طبعا لا ! و أي انسان قاري شوية ديال الاقتصاد غادي يقوليك بلي المغرب خاصو يطور التنافسية ديالو فمجموعة ديال القطاعات باش يقدر ينافس دول اخرى ! التنافسية هي الحل، الدول غاديا و كاتنفاتح على العالم الخارجي ( الا كوريا الشمالية) و حتى حنا خاصنا ننفاتحو و باش ننفاتحو بكل اريحية خاص الاقتصاد ديالنا يكون واجد لهادشي !
تركيا راها القوة الاقتصادية السابعة فأوروبا و الخمسطاش فالعالم ! من احد اقوى الاقتصادات فالشرق الاوسط ، و لي مشا لتركيا غادي يحس بالقوة الاقتصادية ديالهم ! غاتحس بيها و نتا كادور بين حوانت الحوايج باش دير الشوبينغ فاش غاتشوف شحال ديال الحوايج مصنوعين فتركيا و عندهم جودة مزيانة و ثمن فالمتناول ! غاتحس بيها و نتا كاتقدا من السوبر ماركت و كاتشوف الاعداد الهائلة ديال الماركات الوطنية لي عندها جودة عالية و ثمن مناسب ! غاتحس بقوة الاقتصاد فالطرق و الشوارع و الجسور لي كاتقطع البوسفور !
بعيدا عن الخلافات السياسية لي يمكن تكون عندنا مع تركيا و لكن هادشي ماكايمنعش انها دولة ناجحة اقتصاديا و عندها اقتصاد اقوى من ديالنا و مصنف مع الاقتصادات العالمية!