گود سبور//

عبرو لاعبين المنتخب الليبي للفوتسال على التفاؤل الكبير ديالهم بخصوص الماتش ضد المنتخب المغربي فدومي فينال كوب دافريك، وعطاو الكلمة لليبيين بالتأهل لفينال كأس إفريقيا وكأس العالم.

وبعدما تأهل منتخب ليبيا إلى دومي فينال كأس إفريقيا للفوتسال كثاني الگروب 2 برصيد 6 النقاط، بعدما ربحو ليبيريا فالماتش الأخير بنتيجة 11 لـ5، قال حسام الورفلي لاعب منتخب ليبيا: “غنديرو جهدنا فالدومي فينال باش نبانو بصورة كتشرف المنتخب الليبي، وغنديرو اللي علينا فهاد الماتش ونشرفو ليبيا اللي لاعبين بالاسم ديالها، والماتش ما غيكونش ساهل ضد المنتخب المغربي، وكنواعدو الجماهير الليبية بالتأهل للفينال وكأس العالم”.

أحمد اليمني لاعب المنتخب الموريتاني أكد أن الدومي فينال ضد المنتخب المغربي، هو فرصة للاعبين الليبيين باش يرجعو أمجاد منتخب الفوتسال الليبي بطال إفريقيا 2008، وقال فتصريح له بعد التأهل لنصف النهائي: “دابا غنوجدو للماتش الجاي ضد منتخب المغرب ونديرو احسن ما عندنا، حنا باغيين نرجعو الماضي ديال المنتخب الليبي، وغنديرو ماتش مزيان ضد المنتخب المغربي، ونتمناو نتوفقو ونتأهلو للفينال وللمونديال”.

أحمد العجناف لاعب منتخب ليبيا حتى هو أكد أن مواجهة المنتخب المغربي، هي فرصة لهم باش يرجعو منتخبهم للأمجاد ديالو، وقال: “باغيين نرجعو الأمجاد ديالنا ونرجعو المنتخب الليبي للفوتسال كيفما كان شحال هادي، وغنديرو جهدنا فالماتش ضد المنتخب المغربي ونخرجو رابحين”.