الرئيسية > آراء > كيفاش جوميا كاتفلى على الكليان و كاتوهمهم بالبلاك فرايداي (بالصور)
24/11/2017 14:27 آراء

كيفاش جوميا كاتفلى على الكليان و كاتوهمهم بالبلاك فرايداي (بالصور)

كيفاش جوميا كاتفلى على الكليان و كاتوهمهم بالبلاك فرايداي (بالصور)

سهام البارودي كود ////

البلاد فرايداي أو الجمعة الأسود هو واحد التقليد (عندو تاريخ غادي نتطرقو ليه فمقال آخر) و لكن دابا ولا تقليد تجاري كايمارسوه الشركات العالمية فآخر جمعة فشهر نونبر الهدف ديالو هوا يجرو بزاف ديال المستهلكين لعندهم فنهار واحد و يتشهرو اكثر و اكثر و هادشي عن طريق عرض سلعة لي غالية و لكن بثمن رخيص بزاف ! مثلا تيليفون ساوي خمسالاف درهم تقدر تشريه بخمسين درهم ! و كاتلقا مواقع كبرى محافظة على هاد التقليد فحال آمازون و ايباي…

هاد التلقيد وصل لعندنا للمغرب هادي شي عاماين ! العام ناضت آ سيدي جوميا تاهي بغات دير البلاك فرايداي عبر الموقع ديالها و لكن الناس ماكانوش راضيين على التجربة ديالهم و بانو فيديوات ديال ناس كانو مكونيكطيين فالوقت لي علنات عليه جوميا و احتارمو الشروط لي حطات و هكاك فشلو يشريو منتوج واحد من المنتوجات المعروضة و دارو الفيديوات و ضارت الهضرة و بزاف منهم تاهمو جوميا فالفايسبوك بالكذوب و الاحتيال على المستهلك.
هاد العام مشيت نجرب براسي هاد البلاك فرايداي ديال جوميا باش ناخد فكرة ! و طبعا طيليشارجيت لابليكاسيو و قاديت بروفيل و بقيت كانساين الطناش د الليل توصل باش ندخل تانا نغمس فالمرقة ديال جوميا مع المغمسين.

ركزو معايا على الساعة فاش دخلت و شنو طرا بالضبط ! هاد التسلسل ديال التصاور كايلخص شنو تعرضو ليه بزاف ديال الناس لي بغاو يشاركو فالفرايداي ديال جوميا.

١-كاتحاول تدخل كايقولو ليك بلي الماگازة عامرة ( هادشي قبل الطناش ديال الليل كيما كاتشوفو فالصورة)

كاتبقا تقاتل باش دخل و فاش كادخل كايقولو ليك عاوتاني بلي كاين مشكل ديال ” الصيانة” و بلي غايعالجوه غا صبر شوية

كاتصبر و تقاتل و تبقا تبرك على ديك اعادة المحاولة اعادة المحاولة تاكاتبان ليك صفحة جديدة و لكن فاش كاتدخل ليها تاهي كايقولو ليك فيها مشكل


كاتبقا صابر كاتقول مافيها باش نتبعو الكذاب تال باب الدار

فاش كاتدخل أي حاجة كليكيتي عليها كاتلقاها سالات ! تباعت ! باح ! لمن؟ وانا مكونيكطية من قبل مايبدا الفراي داي ! و واخا كاتبان ليك فالسطوك مازالة كاينة كيما كاتشاهدو فالصورة


و فالأخير واخا كاتنجح تختار شي حاجة و دوزها لل”قفة” الافتراضية ! ماكاتجي فين طل عليها تا كاتلقاها ولات en rupture de stock.

فهمت بلي ماغانصور والو من هاد البلاك فرايداي و خرجت من بعد ماضيعت واحد ثلاتين دقيقة من وقتي كانحاول تانا نتقدا شي حاجة.

و فاش طليت على لاباج فايسبوك ديالهم لقيت عرام ديال الناس مكشكشين و كايسبو فطواسل مت مت جوميا و كايتاهموهم بالنصب و الكذوب !

انا ماعنديش مشكل مع انه هاد الشركة تلتاجئ لهاد الأسلوب باش تعرف براسها و تشهر و تخلي الناس يطيليشارجيو لابليكاسيو ديالها و لكن ماخاصهاش تنسى الأكثر العكسي لهاد الممارسات على السمعة ديالها ! حيت كيما خلاوها الگور
فالوصايا العشر للماركوتينغ :
Un client satisfait en parle à 2, un client insatisfait en parle à 10.

موضوعات أخرى

19/03/2024 03:00

مرض نادر كينتاشر فالجابون بطريقة كتخلع.. والعلماء مقدروش يعرفو الأسباب ديالو

19/03/2024 00:00

رابطة البوليساريو فالصبليون كضغط على وزارة الثقافة باش تحيد الاعتراف بمغربية الصحرا من الجريدة الرسمية ديال إسبانيا 

18/03/2024 22:30

فرحات مهنا لسيدنا وللمغاربة: القبايل ممتنة للمغرب وللملك وكنطالبو بالدعم السياسي والدبلوماسي باش نوضعو حد للجزائر