كود الرباط//

وزير الدفاع الاسرائيلي بيني غانتس، لي دار زيارة تاريخية للمغرب، كرم الصحافة المغربية بمقال غير عادي نشراتو “الاحداث المغربية” و”كيفاش” ولوبسرفاتور” بالفرنسية اللي كيملكهم الناشر احمد الشرعي. فهاد المقال هضر فيها على العدو الموحد والتهديدات المشتركة في الحدود بالنسبة للبلدين.

فالمقال ديال غانتس هضر على حادثة مقتل اسرائيلي ف طنجة وكيفاش الملك محمد السادس تدخل وتاصل بعائلة الضحية وعزاها وتكلف بنقل الجثمان، طبعا هذا سكوب تعطا لجريدة مغربية من طرف مسؤول قوي داخل الحكومة الاسرائيلية.

فالمقابل كنلقاو مسؤولين مغاربة ضاربين طم، سادين على الصحافة المغربية، مهمشينهم..هادشي كيخلي الصحافة المغربية تقلب على الاخبار عند الاسرائيليين وتجيب خبار بلادها من تل ابيب، شوهة للتواصل ديال وزارة الخارجية. باش تاصلو بيها صحافيين مغاربة قالو اه غادي يكون غير الاعلام الرسمي صافي. فحين ان المسؤول الاسرائيلي جاب بزافت الصحافة.

هاد الوزير بارطاجا المقال ديال لوبسيرفاتور فصفحتو على تويتر. قيمة كبيرة لجريدة مغربية فالعالم، دارها وزير دفاع لدولة قوية فالمنطقة.
واش هاد الخارجية واللي مكلفين بالعلاقات مع اسرائيل فالدولة، باغين صحافيين طبالة ولا صحافة كتأمن بحرية التعبير والديمقراطية وتسول وتحرج المسؤولين، راه كيفما خصنا نستوردو السلاح والتكنولوجيا من اسرائيل خصنا نستوردو معهم حرية الصحافة واحترام السلطة الرابعة.

القناة الاسرائيلية (12) قالت بلي اسرائيل وقعت مع المغرب على صفقة بيع اسلحة بقيمة مئات ملايين الدولارات، وجاءت هذه التطورات في اطار الزيارة التي يجريها وزير الامن الاسرائيلي بيني غانتس الى الرباط.

كولشي كيهضر على الصفقة الكبيرة، الا الصحافة المغربية مفراسها والو.. الصحافة الاسرائيلية صورت فيديوهات وثقات لحظة ب لحظة. واش المغاربة باغي صحافيين طبالة مايديرو لا ربورتاج ولا تقرير على العلاقات بين البلدين، فقط يتحولو الى سياح كيزورو اسرائيل على نفقة الخارجية الاسرائيلية كلما اتيحت لهم الفرصة.. شوهة لبلادنا شوهة لديمقراطيتنا الفتية ولتاريخنا الشامخ.