محمد سقراط-كود///
حاليا أغلب الجماعات القروية كتلقى عندها نقل مدرسي خاص بتلاميذ الجماعة، وكاين البلايص لي أسر التلامذ كيخلصو بالشهر كاين لي فابور المهم كل واحد شنو داير في جماعتو، وهاداك النقل المدرسي من غير أنه كيوصل التلاميذ البعاد للمدرسة وكيخلي عندهم فرص متساوية مع الآخرين في التمدرس، فراه كيجنبهم حتى مخاطر الطريق قليل دابا فين تلقى تلاميذ كيديرو أوطوسطوب فشي جماعات، كاين بلايص لي نائية وفيها النقل المدرسي مغراوة مثلا نواحي بويبلان أو عبو الكحل نواحي فيكيك، ولكن الى جيتي لفاس لي هي تاني أكبر مدينة في المغرب، ودزتي حدا مرجان طريق موزار، غادي تلقى كل عشية طلبة موزار والنواحي معنكشين في المركوب وغادي تلقى تلاميذ ولاد الطيب لي فالثانوية كيديرو أوطوسطوب أو غادين على رجليهم زرافات زرافات، مشهد مابقاش في القرى النائية باقي وسط فاس.