كود الدوحة ///
الدوحة هاد الصباح فايقة ثقيلة. كاين الصدمة ديال اقصاء السعودية وتونس من المونديال القطري البارح الاربعاء 30 نونبر 2022 وكاين ماتش معولة عليه الدولة المضيفة باش ينقد هاد المونديال كرويا. ما كيعنيش ان الكورة ما كانياش فهاد المونديال. ابدا. الكورة كاينة وموجودة ومع توالي الماتشات الريتم كيطلع بحال اللي شفنا مع المنتخب الارجنتيني. خسر مع السعودية جوج لواحد وفاق مع المكسيك وربحها بجوج لزيرو ولكن بين مستواه البارح مع بولونيا فالكورة وفالنتيجة وطلع اللول فمجموعتو.
شفنا المستوى لكبير لفرنسا فماتشاتها اللولين. شفنا لبرازيل كيف كتلعب. شفنا الصبليون. شفنا المغرب اللي مازال ما تماركا عليه حتى بيت فهاد المونديال اللي فايت معدل الاهداف جوج ونص فكل ماتش.
لكن قطر بنات مونديالها علي انها كتمثل لعرب والمسلمين. كلشي اللي دارتو هاد الدولة من نهار الافتتاح كان على هاد الشي. حتى باش هاجموها على مواضيع ما عندها علاقة لا بالعروبية ولا بالاسلام بل الدين ككل الاديان جات للدفاع عندها٬ شفنا قطر من الفوق للتحت كيرددو نفس العبارة. اه حگى هاد المونديال منظم من قبل دولة عربية اسلامية وهادوك اللي كينتقادو راهم ضد العرب والمسلمين. اللي كينتاقدو انتاقدو حقوق الانسان. انتقادو تقارير حقوقية على وفاة عدد كبير من العمال فورش بناء التيرانات والبنيات التحتية. راه كيهدرو على 6 الاف شخص. هاد الشي كذباتو الحكومة القطرية ولكن تركيزها كان على اعطاء هوية عربية اسلامية للمونديال.
تنظيميا النيڤو طالع ولكن كرويا خاص شي منتخب يبقى. يتأهل للدور الثاني. دابا الكورة عند المغرب. ولا قطر معولة علي المغرب. تأهلو اليوم للدور الثاني كيعني بزاف لقطر.
كنشوفو التيرانات عامرين ولكن ماشي كلهم مشجعين لمنتخبات الدول. كاين حضور عمال هنا فقطر عطاوهم علم تلك الدول وتونياتها. التشجيع ديال بصاح والجمهور ديال بصاح هو للدول العربية ولايران.
التشجيع الواعر كان للمغاربة وللتوانسة وللسواعدة وللدولة المضيفة قطر.
دابا قطر بلا المغرب فالدور الثاني غادي يفقد قاعدتو الشعبية. جمهور بصاح ماشي مزور. جمهور كيحيح. كيعطي صورة واعرة للكورة.
لمغاربة امل هاد الدورة. امل المونديال القطري. كتشوفها فشوارع الدوحة. شي عينة ما كانش كتديها فالمغاربة ومن البارح ولاو محط انظارهم. كلشي كيربح بيك. كيكبر بيك. كيحسسك بالفخر بوطنك. احساس زوين واخا من دول ما كتشاركش معاها نفس القيم نفس الرؤية للعالم.
كلشي مع المغرب. كلشي مع الاسود.
