حكيمة لعروسي كود ////

ماغاديش ننشر صوري ونتباهى بوجود أمي معي إحتراما للناس اللي تيتموا قبل الوقت و ناس عمرهم ماشافو أمهاتم وناس عاشو اليتم بعد ولادتهم و عمرهم ما قدرو يقولوا كلمة ماما ..

احتراما لمشاعر المحرومات من الأمومة وإحتراما للنساء اللي تايعانيو من العقم أو اللي اضطروا لإزالة الرحم بسبب المرض اللعين ( السرطان ) قبل ما يعيشوا إحساس الأمومة …

لهذا أطلب من كل المتابعين يعايدو أمهاتهم بلا ما يجرحوا مشاعر الآخرين …

وأوجه رسالة خاصة لكل الأمهات ماتعلميش ولدك يضرب أختو ويعاملها بخشونة لأنه ولد وماتفرقيش في التربية بينهم و تقولي هذا ولد وهادي بنت حتى في الخروج لأن اليوم تانعيشوا في مجتمعات ممكن الولاد يتعرضوا للاغتصاب بحال البنات لأن المرضى النفسيين و البيدوفليين ماتيفرقوش بين طفل وطفلة إذن ننساو فكرة الولد يخرج والبنت لا .. بجوجهوم أطفال غير مسؤولين على أفعالهم و خاصهم التوجيه من الأباء ….

تعلمي سيدتي تربي ولدك أن التحرش والعنف ضد المراة ماشي رجولة ….

أنتوما العيالات اللي تاتربيو الرجال لأنكم ولدتوهوم و كاتقضيو معهم وقت أكبر من الأب ونتمنى سيدتي ماتعلميش ولدك يربيك ويفرض عليك رأيو و يقوليك اشنو تلبسي و أشنو ديري …

لأن اللوم الأكبر ماشي على الرجال فقط اللوم على النساء اللي ولدوهوم ورباوهم بطريقة خاطئة و خلقوا لينا مجتمع ذكوري محض ….

بكل بساطة نصيحة زوينة ليك ايتها الأم ربي ولدك كيفما تتمناي يكون راجلك او خوك او الأب ديالك .

رسائلي للكبار فهما لا الكبار سنا .

الله يجيب اللي يفهمنا ولا يعطيناش .