أحمد الطيب – كود فاس///

فضيحة جديدة ديال محسن الزواق مدير الأكاديمية الجهوية للتربية والتكوين بجهة فاس مكناس. هاد المرة السيد فرض راسو على كولشي وحاكم كولشي داخل الأكاديمية والمركز الجهوي ديال الامتحانات ومديرية التعليم وكولشي.

وحسب ما أكدته مصادر من الأكاديمية لـ”كود”، فإن الزواق اللي الأيام ديالو معدودة بسبب تعثر عدد من المشاريع التعليمية بالجهة دوز ساعات فمركز الامتحان ففاس وخدا نتائج مترشحين ديال الباك وعطاهوم لصحاب مقربين منو.

وذكرت مصادر “كود” أن عدد من الأعيان بفاس والمسؤولين خداو نتائج الامتحان ديال ولادهوم عن طريق المسؤول الأول ديال التعليم بالجهة اللي من المفروض يحترم السرية ديال هاد النتائج. لكن معامن تهضر.

“كود” حصلات على عدد من النتائج منذ زوال اليوم الخميس. الزواق كان عطاها لحصابو لكن كنرفضو نشروها احتراما لمصادرنا. وزارة التربية الوطنية خاصها تفتح تحقيق فهاد العبث اللي دايرو مدير الأكاديمية.

ماشي غير هادشي. مدير الأكاديمية طلب من المسؤولين فمركز الامتحان باش ميخرجو حتى شي نتيجة إلا بأمر مباشر منه، وقاليهم باللي العام الفايت ناض مشكل على تسريب النقط ودبا مابغيناش نعاودو هاد الخطأ. مزيان أسيدي الخطأ ديرو غير نتا بوحدك ولفضحية ديرها غير نتا باش باش تكون بطل على موظفين بسطاء وتسرب النتائج غير نتا بوحدك.

“كود” هضرات مع عدد من المسؤولين داخل الأكاديمية وأكدوا باللي المدير الزواق هو الوحيد اللي كان عندو الإمكانية باش يسرّب هاد النتائج وعطا بزاف ديال النتائج لصحابو، مضيفا أحدهم في اتصال مع “كود” بالقول: “هادشي عيب وعار وخاص حد لعبث هاد المدير”.