كود كازا//

الهيئة التنفيذية للمسلمين حسمات فالإجراءات الاحترازية اللي خاص تحتارم خلال شهر رمضان من طرف المسلمين فالبلاد، ابتداء من اليوم الثلاثاء اللي هو اول ايام هذ الشهر فبلجيكا.

ومن خلال خلاصات مجلس علماء الدين، التابع للهيئة التنفيذية للمسلمين ببلجيكا، فرمضان هذ العام غيجي لثاني مرة فظرفية استثنائية بسباب فيروس كورونا.

وعلى هذشي، كيتوجب على المسلمين فبلجيكا يحافظو على مسافة الامان، لكن فالمقابل يمكن يبقاو قراب من شخص ما على الأكثر، وفهذ الحالة التباعد ديال متر ونص ماشي ضروري.

بالنسبة للعراضات، كل عائلة عندها الحق تعرض على شخص واحد على الأكثر للدار فكل مرة، وماشي ضروري يكون معاه التباعد، اما للي عايش بوحدو يمكن يعرض على جوج دالناس، والمشكل كاين غير فالتجمعات الكبيرة.

وبرا، كيمكن يتلاقاو 4 دالناس على الأكثر، ويحافظو على مسافة امان ديال متر ونص، والولبدات الصغار قل من 12 لعام مامحسوبينش.

بالنسبة لدور العبادة والمساجد، فالتجمعات اللي ماكتفوتش 15 لشخص هي بوحدها اللي مسموح بيها، بغض النظر على مساحة المساجد او اماكن العبادة، والناس اللي صغر من 12 لعام والإمام مامحسوبينش.

وخاص فالجوامع يتم الحفاظ على متر ونص ديال مسافة الامان بين الحاضرين، ويدار الماسك، وممنوع تتقاص الاشياء والآثاث من طرف بزاف دالناس.

بالنسبةللحجر الصحي، ففوالوني وفلاندر كاين من 12 دالليل حتى ل5 دالصباح، فبروكسيل من 11 دالليل حتى ل6 دالصباح.