كود سعيد الشاوي ////

شي وحدين كيكذبو علي لمغاربة باش كيصوروهم باللي هاد الارتفاع فالارقام فعدد الاصابات بكورونا فيروس كاين غير عندنا بوحدها. شي وحدين بعقلهم وكينشرو مغالطات وتهويل بطريقة متخلفة. مخليين خدمتهم اللي كيتخلصو فيها من الدولة وتابعين نشر هاد التخربيق فالفايس.

راه منظمة الصحة العالمية حذرات من موجة جديدة او من تزايد أعداد الإصابات الجديدة بكورونا فيروس فالقارة الأوروبية. علاش حقاش اوربا بدات مرحلة رفع لحالة الطوارئ والحياة بدات ترجع بالتدرج لما كانت عليه.

مدير فرع أوروبا في منظمة الصحة العالمية هانز كلوغ قال فمؤتمر صحافي عبر الفيديو من كوبنهاغن انو عودة الحياة بعد 104 يوم من الاغلاق يخلي حالات جديدة تبان. وقال 30 بلاد سجلات ارتفاع فعدد الإصابات التراكمية خلال الأسبوعين الماضيين”. واخا هاد الشي متحكم فيه ولكن راه كورونا رجعات فبولونيا والمانيا واسبانيا. هاد الاخيرة بانت فالصليب الاحمر بمالقا. هاد النهار قالو باللي تسجلات تقريبا 90 حالة. اسبانيا كانت يالله فتحات حدودها مع شي دول اوربية من فضاء شينكن نهار الاثنين اللي فات باش طور سياحتها.

البرتغال اللي كانت حالتها الوبائية مستقرة حتى هي عرفات ارتفاع فعدد المصابين بهاد الفيروس. سلطات لشبونة قررات ترجع الحجر ل19 مقاطعة فالعاصمة من اصل 21 مقاطعة من الاثنين اللي جاي٬ باش توقف الانتشار.

فاستراليا دخل الف عسكري كاع باش يحاصر اوطيل فملبورن فيه مواطنين من هاد لبلاد رجعو من برا ولقاو فيهم هاد الفيروس.

يعني هاد الشي اللي بان فالمغرب واخا ارقام طالعة راها داخلة فهاد الشي اللي كتعرفوه دول كثيرة.

ظهور بؤر بحال اللي بانت فلالة ميمونة ولا ديال المرسى فالعيون ولا معمل رونو فطنجة او بلايص اخرى ماشي امر مقتصر علي المغرب يا وجوه التشاؤم اللي كتسوقو خطاب بحال كمامركم فالفايس. الحذر اه ولكن المغالطات باللي غير المغرب بوحدو اللي فيه هاد الشي للا.