احمد الطيب – كود الرباط //

هاد مهدي قطبي رئيس المؤسسة الوطنية للمتاحف غبي شوية. متحف محمد السادس للفن الحديث والمعاصر بالرباط عندو حدث كبير وهو “معرض “دولاكروا، ذكريات رحلة إلى المغرب”. غادي يكون من 7 يوليوز حتى ل 9 أكتوبر 2021.

هاد النشاط غير المسبوق فالقارة الافريقية وعند عريبان مزيان. منظم بشراكة مع المتحف الوطني أوجين دولاكروا ، المؤسسة العمومية التابعة لمتحف اللوفر.

فيه “يستعيد رحلة الرسام من خلال اللوحات، والرسومات والألوان المائية ولكن أيضا جميع الأدوات و الأزياء والأسلحة والآلات الموسيقية التي جلبها من رحلته ورافقته طيلة مسيرته الفنية. وبذلك فهو أول سفير مغربي للضوء والألوان التي تأسره والأزياء والتقاليد التي يرسمها بافتتان” كيف قال بيان للمؤسسة اللي ضاف “بمجرد عودته الى فرنسا ، وحتى وفاته ، لم يتوقف الفنان أبدا عن إعادة إنتاج التأثيرات العديدة التي حملها معه من رحلته في أعماله الفنية الغزيرة”.

حتى لهنا مزيان ولكن هاد قطبي عزيز عليه يركب على الموجة. قال باللي “انسجاما مع إرادة الملك محمد السادس بالحفاظ دوما على أواصر متينة بين المغاربة المقيمين بالخارج وبلدهم الأم، فقد قررت منح تخفيض بنسبة 50 بالمائة للولوج الى المعرض.

وحتى المعارض اللي فمتاحف تابعة المؤسسة: متحف التاريخ والحضارات بالرباط ، متحف تطوان الاثري ، متحف القصبة للثقافات المتوسطيةبطنجة، المتحف الوطني للخزف بآسفي، دار الباشا – متحف الروافد ،متحف دار السي سعيد للنسيج والسجاد في مراكش، متحف محمد السادس للفن الحديث والمعاصر، والمتحف الوطني للتصوير في الرباط .

دابا هادو للي جاينين من بلدان فيها ثقافة المتاحف وسبق شافو معارض الكبار علاش يستافدو من التخفيض. هادا راه حدث للمغاربة. تشجيع للمغربي باش يولي يمشي للمتاحف والمعارض. حنا ما عندناش هاد المناسبات. اذن كان خاصو اقل من 50 بالمائة للمغاربة اللي دايرين الڤاكسان او لعموم لمغاربة.