محمد سقراط- كود ///

—

كاين واحد التشبيه مغربي كيتقال لبنادم لي مضبع ومسهوك ومكلخ ، كيقولوليه مالك واش واكل لخرى ، وبحكم أن المغاربة بزاف منهم مضبع ومسوهك لدرجة أنه كاين منهم لي كيصوت مثلا من أجل التغيير ، وكاين منهم لي باقي تايقين مثلا فأن الخوانجية ماشي بحال لخريين ، علما أنهم صدقوا كثر من لخريين تشبتا بالمناصب ، وكاين منهم لي كيعتابر المغرب أجمل بلد فالعالم وماخاصنا تاخير وطبعا هادا واكل لخرى ديال بصح ، وهاد اليوماين مابقاتش هاد المقولة مجرد تشبيه وانما واقع معاش بعدما لقو واحد السيد كيسمد الفيرمة ديالو فشيشاوة بالفضلات البشرية ومن خلال هاد الحادثة عرفنا علاش منتوجات هاد المنطقة كتمتاج بالجودة واللذة .

من غير هاد الحادثة ، بزاف ديال المغاربة عارفين أن العديد من المنتوجات الفلاحية فالمغرب مسقية بمياه الواد الحار ، وهادشي جنب الطريق غير حدا برشيد يمكن أي واحد يشوف هادشي بعينيه ، وبزاف عارفين أن جودة هاد المنوتاجات الفلاحية لا يعلى عليها ، غي هو فزمن المواقع الإجتماعية هاد الحادثة بصح خدات بعد كبير حيث ماتزامناتش مع شي فضيحة خرى ، بحكم عشقنا لهريد الناب على الفضائح وبحكم  أن العثماني ماقايمش بالواجب ديالو كرئيس حكومة وضارب الطم ، ومخلينا بحال ليتامة خاصنا غي علاش نهدرو حتى جاب الله هاد الفيرمة المسمدة بالفضلات البشرية لي طلات الفايس بالخرى .

هاعلاش بزاف ديال المغاربة مداويخ ومضبعين حيث ماشي غير بحال الى واكلين لخرى وانما واكلينو نيت ، أنا شخصيا الصيف لي فات الصيف لي فات كنت غي كنسول واش الدلاح ديال شيشاوة وكنشري عينيا مغمضين وديما كان كيخرج حلو ولذيذ فالمذاق سولت واحد الصديق صاحبي ولد المنطقة قالي راه التربة زينة عندهم تما وكاينة شي زريعة كتجي من اسرائيل كتخرج حلوة ومليحة …. هاد العام قاليك اعتقال صاحب ضيعة فشيشاوة لأنه كان كيسمد الدلاح بالخرى ديال بنادم .. طلع لخرى ديال شيشاوة لي زين ماشي التربة، وعاد عرفت علاش حتى أنا مع الآخرين مستوه وحال فمي وأحلم بغد مشرق ، حيث شبعان خرا.