حكيمة لعروسي كود ////
المرأة المسنة اللي سميتها مي عيشة واللي حاولت الانتحار من فوق البوطو او فقط طلعات باش توصل صوتها للناس … ملي شفت صورتها على شبكات التواصل الاجتماعي قربت الصورة و شفت في وجها معنى القهر والحكرة … فعلا صدقت مقولة الأقارب عقارب … مافهمتش كيفاش هاد الاقارب ديالها قدرو يحتالو عليها مسكينة ويبيعوها أرضها فوق ضهرها دون علمها بالنصب و الاحتيال بلا رحمة ولا شفقة … مجرد أنها وصلات لهاد الدرجة أنها تطلع لبوطو وتبكي وتغوت وتندب حظها هذا دليل على انها إلتجأت لكل الطرق ومالقات اللي يسمع ليها ويعاونها مالقات غير البوطو … لأن بكل بساطة فقدنا الإنسانية ….
حاولو تفهمو مابين السطور ( البوطو كان أحن عليها من الأقارب و من الناس اللي صوروها وسمعو قضيتها وسكتو او ضحكو !! الضحك راه فيكم ماشي في مي عيشة ) شكرا مي عيشة أنك دقيت ناقوس الخطر وفكرتينا كاملين بأننا فقدنا إنسانيتنا خصوصا ملي بداو الفيدوات لايف لعملية الإنتحار مع تعليقات ساخرة …مافهمتش واش تاضحكو في كلشي ؟ واش مابقاتش فيكم مي عيشة ؟؟ واش شفتو وجهها اللي فيه معالم اليأس و الظلم والحكرة والفقر والخوف والدموع و ماحركاتش فيكم ذرة من العطف و الرحمة … أنا قطعات ليا قلبي لهذا من هذا المنبر أعلن تضامني اللامشروط مع مي عيشة و تانطلب من جميع الناس اللي ماعندهم باش يعاونوها يبارتاجيو قضيتها حتى يوصل صوتها لأعلى مستوى وتاخد حقها .. رسائلي للكبار فهما لا الكبار سنا . الله يجيب اللي يفهمنا ولا يعطيناش .