محمد سقراط كود ////

واحد النهار قبل شي عام هادي قلت صافي راه حن عليا الله وأخيرا المخزن أو ممثليه أو اذنابه دار عقلوا وقرر أنه يخدمني معاه فشي وحدة من المرفقات ديالو الكثيرة، سيكوريتي فشي كلينيك ديال شي حد كيعرفوا، شاوش فشي ادارة، عطاي ديال المخزن فشي دريبة، عوينة فشي حزب، كارديان فشي شارع رئيسي، سرباي فشي ريسطو بشكل ،صحافي فشي جريدة، المخزن راه عندو شلا خدامي يقدر يحط فيهم واحد بحالي بلا موهبة بلا شهادة بلا قراية بلا والو.

فهاداك النهار عيطو ليا موقع 360 لي مكنتش كنعرفو من قبل، ماشي حيث هو مامعروفش ولكن حيث أنا جاهل من هاد الناحية واخا بحكم نوع العمل ديالي ربما كيفرض عليا نطالع على الأخبار وداكشي إلا أنني مكنقرى فحتى شي موقع من غير كود حيث طريقة صياغة أخبارها كتضحكني كثر ملي كتنورني، وخصوصا لي كيكتبها أحد نجيم شخشيا بعناوينها السريالية احيانا، مشيت سولت زملائي فالمهنة قالوا ليا صافي غناك الله، مشيتي بعيد أسقيريط ، العام الجاي غيلقاك فموازين في أي بي ، وموكا ماغادي يبغيها بوبي، راك غادي تولي مقرب من صانعي القرار فالبلاد والى طلع ليك شي زهر تقدر تولي تصنعوا حتى نتا، هالهمة ولد بلادكم وراه محيح فهادشي ديال صناعة القرارات مالو باش حسن منك. كلهم تكلمو على 3 ام: محمد منير الماجيدي

علمت نجيم بأن موقع 360 عيطوا ليا باش نخدمليهم شي فيديوات كيتكومكوا بيهم على السياسيين. قالي الله يسهل عليك أنا بغيتليك غير الخير وتدور صريف شوية ونشوفك متألق ( حيث هو معاه غي الحزقة والتشرد والمستقبل المجهول). وهو يزيد: ولكن الى خدمتي معاهم ماتبقاش خدام معايا، مايمكنش تكون خدام معايا ومع هاديك الجهة. انا عندي موقع مستقل ويستحيل نخلي شي صلة بشي جهة فالدولة بماجيدي او الهمة او غيرو… تا آشمن هادا وداك راه فهد العراقي لي عيط ليا وزايدون انت اللي عطيتيه النمرة. وزايدون سي منير حرفتوا البانوات ديال الإشهار آش جابو لشي صوحافة…. أسيدي هدرة وحدة راه قلتهاليك مايمكنش تخدم عندنا بجوج، آش باغي تكون نتا كيم فيليبي ( عميل مزدوج قلبوا عليه فكوكل) اختار ولك واسع النظر.

ملي مشيت للمقر ديال موقع 360 واللي كان حقا مقر موقع اخباري متميز، فيه الباشار والبيسيات ديال آبل بجميع الأنواع مابغاهم بوبي على خلاف مقر كود لي عبارة عن ميني أيباد يحمله معه نجيم من مقهى لمقهى، غي كيبانليك بحال داكشي كتعرف موكة مابغاها بوبي، ريحت مع فهد ومع عزيز داكي، لي كنحتارمو بزاف من نهار قال للبلغيتي نتا كتعرفك غي خالتك، شدييد.

كان لابس نظارات كبار وكسوة. كيهدر غير بالقياس وكلامو بحال مصطفى العلوي ديال التلفزيون. بقينا كناقشوا الخط التحريري وموكة وداكشي، قتليهم بلي الى بغاوني نكتب ليهم داكشي خاص ياخدوني جملة. حيث نجيم مابغاش ندير يد هنا ورجل لهيه، وأنا ضروري ليا نكتب مقالات الرأي باش تبقى سميتي رايجة فالسوق، مايمكنش نتدفن من ورا شي عمل ماغاديش يشهرني كثر واخا بفلوس كثر. قال ليا السي عزيز: شوف أوليدي حنا راه ماشي بحال كود حنا راه الله الوطن الملك…

طبعا جاتني الضحكة حيث حتى فكود راه الله الوطن الملك والحرية الفردية والسخرية وشلا مقدسات خريين أهم عدم تقديس الأفراد ولو كانوا. قلت لو واش احنا عندنا شي الاه ووطن وملك اخر وما فراسناش. ربما نقدرو نكونوا مختالفين غي فالمفاهيم الوطن ديال كود مافيهش أقدس من الحرية الفردية والملك ديال كود كتعرفوا من صفحة سفيان البحري. ملك ضريف منفتح انساني كيخدم.

قال لي أنه باش نكتب مقال رأي خاص أولا نقدم اقتراح بالموضوع وننتاظر الموافقة عليه عاد نكتب، وهادشي طبعا ما موالفوش فكود لي كنكتب فيها فوقاش مابغيت ووقت مابغيت و آش مابغيت، عدة مقالات كيقولي نجي مراه ماعاجبينيش وأنا شخشيا مموافقش على الأفكار لي جاو فيهم ولكن غادي ننشرهم ودبر لكرك سوقك هاداك، هاد الحرية طبعا كترافقها الحزقة ولكن ملي كتولفها كيولي صعيب تقبل يتقطعوليك جناوحك مقابل شي ريالات( مقابل بزاف ديال لفلوس يقطعو ليا حتى يدي كاع )، نهار خدمت مع كود كانت الفكرة أنني نتعلم نكتب بعدا وندير سمية ومن بعد نمشي ندبر على راسي فقنت آخر، ندبر على شي عوينة مزيانة، ولكن كود ماشي مجرد موقع كود فيروس كيسري فالدم، ملي تعلمت نكتب راه متعلمتش نكتب أي كتبة وإنما طورت ستيل خاص بكود ومايمكلو يتنشر غي فيها، حيث كود ماشي غي موقع راها تجسيد للفوضى والحرية ديال مولاها، وولات تجسيد حتى لشخصياتنا حنا لي كنكتبوا فيها، لي كيطول كيولي جزء منها وبزاف دازو ومشاو ولكن لي كيتسكن بيها عمرو يقدر يفارقها إلا الى سدها الماجيدي وهنانا وطلق سراحنا نمشيو ندبرو على راسنا ، حيث راه الكتبة فكود ماشي خدمة وانما بلية بحال الهيروين أو الزوفيليا.

فالنهاية منجحتش فأنني نكون عضو فطاقم 360، واخا كنت باغي نحضر موازين في أي بي، وهاني باقي فكود ماشي على ود النزاهة والإستقلال وداكشي وانما على ود أن الكتبة فيها متعة بحالها بحال الجنس( من غير الجنس مع الأمازونية لي المتعة ديالو كتفوق أي متعة)