عفراء علوي محمدي- كود//

هذ العام ماشي كَاع تلاميذ كازا قدرو يحصلو على الكتب المدرسية المقررة عندهم فالمقرر الدراسي، بحيث بزاف دالكتب مقطوعين من كازا فخطرة، ومابقى عند التلامذ فين يقراو، والأساتذة ديالهم حصلو معاهم، وكيضطرو يقريوهم بلا مقرر.

وحسب ما عاينات “كود”، فمجموعة من المكتبات فأحياء مختلفة تقولبو، حيت ماكانوش فاللول جابو السلعة كاملة دالمقررات فاش تفرض على كازا تعليم الوليدات عن بعد، واضطرو يأجلو البلان حتى يدخلو للمدارس، ومن بعد منين رجع التعليم الحضوري السطوك دالمقررات خوا، وبقاو المكتبات بلا سلعة.

أما الزحام هذ السيمانة والمضاربة على المكتبات اللي مازال محتفظة بشوية دالسلعة من العام اللي فات أو خداتها فاللول ديال العام بكري ماتاتصورش، وكاين منهم اللي كتضطر تبقى حالة حتى من مور 8 دليل ببضع دقائق باش تقدر تبيع لكَاع الآباء، وخا من المفروض تسد مع 8.

وفسؤال “كود” لواحد المكتبي على السبب اللي خلا سطوك كازا يخوا من الكتب دغيا والمكتبات تنش الذبان، قال أنه فاش كان التعليم عن بعد، السلعة دالمقررات اللي كانت دخلات لكازا كاملة تفرقات على المدن الأخرى المجاورة اللي بدات فيها القرايا الحضورية، وسطوك كازا رجع كيصفر.

وقال المكتبي، اللي سميتو محمد أمين، وعندو مكتبة فدرب عمر، أن المكتبات دابا كتتسمى الطبعة الثانية، والكتب ماغايوجدو حتى لمن دابا شهر ونص، كيف قال أن بزاف دالكتب مقطوعين فخطرة ومايمكنش تشريهم من كازا فهذ اللحظة، بحال مرشدي في اللغة العربية.

رشيد، مكتبي آخر فسيدي مومن، حتى هو شرح ل”كود” هذ المسألة، وقال أن صحاب المكتبات كيعانيو بزاف بسبب هذ المشكل ديال نذرة الكتب، فهذ الموسم ديال الدخول المدرسي اللي من المفروض يسترزقو فيه ويصورو شوية دالأرباح على الأقل بعد أزمة كورونا اللي كانت حكمات عليهم بالإغلاق لاشهر طويلة.