عفراء علوي محمدي- كود//
“كود” سولات مشاهير وسياسيين وفنانين ومؤثرين وإعلاميين على كيفاش كيدوزو نهارهم فهذ رمضان الاستثنائي مع كورونا، وعلى رأيهم فقرارت خداتها الحكومة.
واليوم حاورات “كود” الممثلة جميلة الهوني، اللي رفضات الهجوم للانتاجات الرمضانية فقط لأنها كتهضر على مهنيين، وحكات على تجربتها فسيتكوم “كلنا مغاربة”.
كيفاش كتدوزي رمضان دابا اللي مسدود علينا؟
عادي جدا مع العائلة.. الصباح كنفيق بكري، كنوجد لفطور لولدي، كنتقضى، كنوجد، وفالعشية كنتفرجو، وإلى كانو شي واجبات ديال ولدي كنعاونو فيهم.. فرمضانات اللي فاتو كنا كنخرجو بعد الفضور دابا لا، وانا حريصة على تطبيق القانون..
واش الإجراء اللي اتخذاتو الحكومة مزيان؟
ماعرفتش صراحة واش فيديهم يطلقو صحاب الريسطورات والقهاوي حيت تضررو بزاف، بصراحة كيبقاو فيا، لكن إلى كان هذشي غيحمي المغاربة كاملين نصبرو مافيها باس، أنا بالعكس مسلكني القرار حيت محتاجة للراحة.
شنو رأيك فمنع التراويح؟
الصلاة مسألة روحية مهمة وكلنا صابرين عليها فهذ الأزمة الوبائية وكنصليو فديورنا، ولو أنه كاينين ناس مرتبطين ارتباط وثيق بالمساجد ومحتاجين ليها، تماما بحال الوالدة ديالي، لكن هي دابا فاهمة الظروف وصابرة، توحشات الجامع لكن نخدمة عقلها وعارفة أنها إلى مشات ليها تقدر تجيب معاها المرض…
كاين اللي باغي يفطر بالعلالي، نتي معاهم ولا ضدهم؟
انا من الناس اللي كيحترمو القانون وبالتالي انا ضد، القانون مجرم هذشي، وهذ الظاهرة كاينة من ديما غير كانو الناس كياكلو فديورهم، اما اللي بغا يبدل القانون فكاين كرق اخرى من غير انهم يخرجو للزنقة.
كيجاوك مسلسلات رمضان؟
انا كنتفرج كل نهار ف”كلنا مغاربة” وعندي تحليل موضوعي عليه واخا ممثلة فيه، كذلك كنشوف “بنات العساس” والمسلسل المصري “لعبة نيوتن”، أما الانتاجات المغربية فهذ الكم الهائل ايجابي، حيت الوفرة كتمكن من التنافس وتخلي الجمهور يعزل، عندنا الحق نديرو أخطاء باش نزيدو لقدام، وخاص نساندو الكتاب القلال للي عندنا والمخرجين الشباب.
كيفاش كانت تجربتك ف”كلنا مغاربة”؟
كان تمرين ليا بعدما تسدو المسارح، ولو انه العمل السابع ليا فالفكاهة، خدمنا فيه بزاف وعرقنا وتكرفصنا، لكن ديما فاش كتدخل للفايس كتلقى الناس كيسبو ويقولو “حامض” كيفما كان العمل، صراحة صعيب الحال علينا، لكن إلى كنا قدرنا، بمجهودنا كلنا، ننتزعو من الإنسان بسمة صغيرة، فهذاك هو الفضل، عاد أن “كلنا مغاربة” متميز حيت فيه جميع اللهجات المغربية، وهذي حاجة جديدة وزوينة.
شنو رأيك فالناس اللي انتقدو إنتاجات حيت “كتسيء لمهنيين”؟
جواب نقابة الفنون الدرامية كان كافي، كنشوف أن الفنان مايمكنش نمارسو عليه الرقابة هكذا، وفوقما يهضر على مهنة ندخلوه للحبس، ديجا عندنا رقابة كبيرة باش مانهضروش فشحال من حاجة بحال السياسة والمجال الحقوقي، بركة علينا غير هذشي..
