نجوى المالحي-كود//

البارح الخميس المغرب فكك خلية ارهابية كانت ناوية تستغل الوضع الوبائي فهاد جايحة كورونا باش تنفذ عمليات دموية في عدة مدن في بلادنا، ولكن اف بي اي المغرب حال عينيه مزيان وقرقب عليهم.

الاعلامي رضوان الرمضاني لي ديما التدوينات ديالو كتستفز بعض الناس لي مكيآمنوش بحرية التعبير، دار بوسط كيسول فيه علاش هاد الناس مداروش لايفات ومقالات ينددو بالخلية لي تشدات.

وكتب الرمضاني في تدوينة نشرها على حسابو في فيسبوك :”هادوك اللي وقت ما كتب رضوان الرمضاني شي جملة كينوضو يجاوبو عليها بالمقالات، ويعطيو فرصة لأتباعهم، و(أ)ضباعهم، يكفروا فينا ويتهمونا بالدياثة والخروج عن الملة (فهاد النقطة وكلت أمري لله)، هادوك الغيورين على الدين وعلى صورة الدين شفتهم ما كتبوش شي مقال ولا دارو شي فيديوهات ولا لايفات ينددوا بالخلية ديال اليوم ويقولوا كيشوهو صورة الإسلام… علاش زعما؟؟؟ زعما الرمضاني “كيشوه” الإسلام (حتى فهادي حسابي معهم أمام الله) أكثر من إرهابيين كانوا ناويين يقربلوا البلاد؟”.

وأضاف مول برنامج “بدون لغة خشب” :”زعما جملة من عند الرمضاني استفزتك آ الأستاذ أكثر من صورة يد ديال رجل أمن تنزف بسبب ضربة من إرهابي؟؟؟ ولا حيث يلا كتبتي فهاد الشي ما غديروش البوز؟؟؟السبب باين… ما نجتهدوش بزاف… ولكن حقيقتهم كتبان دغيا…يالاه نوضو جاوبو دابو واستغيثوا بفحلكم”.