محمد سقراط-كود///

مؤخرا تطبيق OSN  حطو بزاف ديال البرامج الكوميدية التابعة لHBO ولي تداعت في التسعينات والألفينات وفيها مقاطع لكوميديين مشهورين دابا ولكن كانوا في البدايات ديالهم داك الساعة بحال ايدي غريفن ووديف شابيل ومارتن لورنس وآخرون، رغم أن داكشي قديم ومرتابط بالثقافة الأمريكية إلا أنه كيخري بالضحك لسبب بسيط هو هامش الحرية الموسع في تناول مواضيع ذات قدسية نوعا ما، كيضحكوا بالجنس هادي أول حاجة وثم بالدين سيدنا عيسى مكيخليو فيه غير لي نساو، وطبعا بالسياسة بحال بيل ماهير مختص بالضحك بالسياسة أو جورج كارلاين لي كيضحك بالسياسة والدين وعلم الاجتماع والنفس والفلسفة، حقا كاين موهبة كبيرة وكتبة وشركات منتجة وداعمة، وكتاب يهود على قدر عالي في التمكن من الساركازم، ولكن الأساس ديال هادشي كامل هو هامش الحرية لي يخليك تضحك بأيتها حاجة، وكاتين كوميديين يهود كيضحكو حتى بالمحرقة والنازية، وهادشي شجاعة كبيرة.

في المغرب عندنا الكوميدية حقيقية وعالية المستوى ولكن كاينة في الحلقة فقط لأنها خارج الرقابة، الكريمي واحد من أعظم الكوميديين في تاريخ المغرب ولكن في الحلقة ولحد الآن راه الناس حافظة المقاطع ديالو وأنا منهم، لأنه ضحك بالدين والجنس والواليدين والمفارقات الاجتماعية ولكن نهار جابوه في التلفازة فقد القوة ديالو واخا ضحك الناس ولكن كان مظطر يهرج عوض يخرج نوطات مسمومة لأن الرقابة دايرة ليه لجام بحال حزام العفة على فمو ودماغو وروحو، با عبد المجيد والمسيح والهناوات والكريمي وآخرون كون كانوا في ميريكان كانوا غادي يديرو الستانداب كوميدي ديالهم في نيتفليكس و HBOلأنهم لا يقلون مهارة أو إبداع على أي كوميدي عالمي آخر، ايدي غريفن عندو ستانداب كوميدي على كيفاش  خلق الله آدم وحوا وعلى أول بليزير في تاريخ البشرية، إلى تحررتي من ثقافة النيل سات فراه غادي تضحك حتى تسخف وهادشي دايز في إش بي أو، كذلك الكريمي عندو حلقة على يوم الحشر كلها إبداع ويمكن تحطها جنبا إلى جنب مع رسالة الغفران للمعري أو الكوميدية الإلهية لدانتي.

مع أيام الفي سي دي بانت في المغرب ثقافة بديلة مغنيين مشهورين ولكن مكيدوزوش في التلفازة بحال الشابة نبيلة وكذلك أفلام وفكاهيين مشهورين عند المغاربة بلا مايحتاجو التلفازة بحال الهناوات والكريمي، ومن بعد جا اليوتوب وزاد شهرهم وخلق في البداية منصة لكل ماهو غير رسمي، حتى دخلوا ليه الرسميين وبداو يحطو فيه محتواهم ويهزو منو المشاهير وتخلطات داك الساعة بكراع كلب، حاليا كل عام كتعاد نفس الكاسيطة ديال الحموضة، علما أن نفس الحموضة تشاهد بالملايين في يوتوب وعلى القنوات، كبور وحتى هو طاله الإنتقاد علما أنه أحسن شخصية كوميدية خرجات في السنوات الأخيرة، لأنه بطل غير ورع أو مثثاقف، عروبي سكايري شفار بيطالي مقابل غير الناقصة رعواني حقيقي يجادل في بعض المعتقدات الدينية والسياسية والإجتماعية، شخصية فيها بزاف من واليدينا العروبية القحاح قبل أن يصلهم تدين النيل سات والصحوة الإسلامية، وقبل أن تغير جماعة الدعوة والتبليغ بجولاتها في الدواور والقرى والمداشر المعتقدات المغربية التقليدية، راه مايمكنش تكون عندنا كوميدية في ظل الرقابة والقنوات الرسمية والهاكا، السخرية فعل حر لا مقدس له، وباغينوا يكون في بلاد فيها حتى المقدم والمعلم باغين يتزادو على قائمة طويلة ديال المقدسات كتبدى في الله وكتسالي عند المقدم.