الوالي الزاز -كود- العيون///
باشرت “الرابطة الدولية للحقوقيين من أجل الصحراء الغربية” التابعة لجبهة البوليساريو والعاملة إنطلاقا من إسبانيا حملة واسعة ضد وزارة الثقافة الإسبانية باش تتراجع على قرارها الإعتراف بمغربية الصحرا وتعيد تعديل المنشور فالجريدة الرسمية الإسبانية اللي كيوصف مدينة العيون بأنها مغربية.
وحطات هاد الرابطة اللي كضم محاميين إسبان عريضة للوزارة وعطاتها مهلة 3 شهور باش تراجع المنشور ديال الجريدة الرسمية فإسبانيا المتعلق بالمناقصة اللي حطات الوزارة سالفة الذكر باش يتم تجديد المدرسة الإسبانية بالعيون “لاپاص” وهي المناقصة اللي وصفات العيون بكونها مدينة مغربية.
الرابطة ديال البوليساريو وبالإضافة للضغط اللي دارين أحزاب بحال الحزب الشعبي، توعدات الحكومة الإسبانية ووزارة الثقافة برفع دعوة قضائية فحالة إذا لم يتم تعديل المنشور فالجريدة الرسمية، معتبرة أن وصف العيون بكونها مدينة مغربية “يتعارض مع القانون الدولي”.
ويذكر أن رئيسة هاد الرابطة، إيناس ميراندا، كان سبق ليها محاولة دخول مدينة العيون بصفة غير شرعية فبداية يونيو 2023 وتم ترحيلها، بسباب أنها بغات دير أنشطة سياسية فالمنطقة وهي داخلة بتأشيرة سياحية.
