كود احمد الطيب ////
علمت “كود” ان احمد لحليمي المندوب السامي للتخطيط ما بقاش عندو الحق ينشر تقاريرو حول الاقتصاد بلا ما يتشاور ويشوفو لعجب ديالو قبل نشرو. هاد الشي وفق مصدر ل”كود” جا بعد نشر تقارير حول الوضعية الاقتصادية بصفة عامة واحتجت قطاعات حكومية على ارقام لحليمي واكدت انها غير دقيقة. قطاعات قدمات قدام الملك معطيات وخرجات تقارير لحليمي بمعطيات اخرى.
على هاد القبال تقرر ما يشبه الحجر عليه. ايلى بغيتي تنشر شي حاجة ونشوفوها ونتاكدو من الارقام اولا عاد نشرها. هاد الشي جا بعد نشره شهر يوليوز تقريرا على الوضعية الاقتصادية بالمغرب اللي قال باللي قاصحة بزاف.
هاد الحجر جا قبل ما يطيروه من منصبو. لحليمي من اكثر المسؤولين السامين اللي معنيين بالخطاب الاخير للملك فعيد العرش. باش قال خاص جيل جديد وخاص دماء جديدة فالادارة =والحكومة= ويكون فيديهم.
لحليمي كان ناض ليه الصداع مع رئيس الحكومة السابق عبد الاله بنكيران ولكن الدولة خلاتو. ديك الساعة كان عاجبها الحال. اليوم تبدل رأيها وبهدلاتو قبل ما غادية طيرو فالشهر الجاي.
