محمد سقراط-كود///
للأسف قناة محمد السادس واخا تخسرات عليها فلوس كثيرة ولكن ماقدراتش أنها تقوم بدورها كوقاية للمغاربة من الفهم الشرقي المتشدد للإسلام، ومن غير قلة قليلة فالأغلبية باقين طالقين قنوات الدين ديال المشارقة، حتى ولاو ناس عاديين كيفتيو بالحرام والحلال غير من خلال تأثرهم بالقنوات الدينية الشرقية، بالنسبة ليا قناة محمد السادس جامدة لا روح فيها من غير روح الجوامع المغربية لي كتسد بين المغرب والعشا عوض تبقى مفتوحة للشعب يدير فيها لاسييست بحال شحال هادي، وبقاو المغاربة تايهين بين شيوخ و وعاظ الشرق ودعاة الأنترنيت وفقهاء الأدسنس لي جايبين إسلام الشرق المتشدد ودرجوه وخدامين بيه ينشرون التطرف والتشدد.
بالنسبة ليا أكثر فقيه متمكن في الفقه والتاريخ الإسلامي هو أحمد عصيد وراه يستاهل برنامج يومي يبث على قناة محمد السادس بين صلاة العاصر والمغرب، ماغاديش نلقاو شي فقيه مغربي لي يضاهيه في التامغرابيت والمنطق الديني والأدلة التاريخية والفقهية، وكيهدر بلغة بسيطة كيفهموها كاع المغاربة وقليل فيه المحاجية والخبير، وعلاش ماتنفاتحش قناة محمد السادس على المتنورين المغاربة عوض تبقى جامدة كتعاود في خطب وتعطي إرشادات بديهية ديال أركان الإسلام أركان الصلاة، الناس كيهربوا من هاد الخطاب والرؤية الرسمية للدين الجامدة وفي الجهة الأخرى كيلقاو دعاة الأدسنس يتربصون مع الدولة باش يعوضوا الفراغ، وللأسف كيعوضوه بالتشدد والتخلف والفهم الجامد للدين.
خاص قناة محمد السادس للقرآن تصالح مع ذاتها وتقدم لينا برامج دينية مغربية ونشوفوا أحمد عصيد كيقدم برنامج ديني راه عارف على الإسلام أكثر من أي لحية داير فيها داعية وعلاش لا مستقبلا مانشوفوش حتى نوستيك في برنامج على قناة السادسة كيعاود السيرة بطريقته، أو كيعاود رحلتو الفكرية الشخصية من التطرف إلى الإعتدال ، أو برنامج خاص لرشيد أيلال يهدر فيه على البخاري وعلاش أننا كمغاربة ماعندنا علاقة بيه، وأنه خاص يكون عندنا فكرنا وعقيدتنا وفهمنا للدين الخاص بينا، وأننا كاع ممحتاجين الشرق يجيو يديرو علماء علينا، راه واحد قوة الإنبطاح عند بعض المغاربة عجيبة، يجي غير واحد مصري كان كيسرح الجمال عند الكفيل في السعودية في الربع الخالي ويتعلم غير كلمات بالعربية الفصحى يقدر يجي للمغرب ويديروه علامة من ورا الإمام مالك مباشرة بقوة الإنبهار في كل ماهو جاي من الصحرا و ورا الجمال في الربع الخالي.
