كود اسماء غربي ///////

صدفة كانت السبيل الى اكتشاف حجم فضائح قطاع الصحة باكبر مدن الدار البيضاء. القصة التي تحيكها لكم “كود” عاشها مواطن ليلة الخميس الماضي. انها عنوان فشل جماعي للمغرب في قطاع الصحة. اللي مرض ليه الله اما اللي قسمو قسم ابوقراط باش ياخدو الشهادات فغالبيتهم حنتو وكيخليو القسم نهار ياخذو الشهادة اتصلت عائلة محمد تستنجد. كان يسود الاعتقاد باللي تصاب بجلطة فالدماغ. كيغوت واولادو كيبكيو. عدم معرفتهم خلاتهم ما يعيطوش على لابيلانص. جابوه اول مرة لمصحة صندوق الضمان الاجتماعي بالزيراوي. دخل مع التسعود تقريبا. السيد كيغوت والطبيب كان الداخل بقى خمسة الدقايق عاد خرج. رسل ليه فرمي “شكون هادا” سول واحد كان معاه حارس فالمصحة “هاداك فرملي”.

جا الطبيب. طل عليه وكال “خاصو سكانير”؟ اهاه ولكن ما عندناش ديوه لمصحة الضمان الاجتماعي بقطع ولد عايشة؟ كيفاش السيد كيغوت ويتألم وعلاش عندكم مستعجلات ايلى ما عندكمش امكانيات؟ الطبيب ما جاوبش يقول مصدر “كود”. شخص اخر سيشرح ان المصحة كدير التقشف وما عندهاش باش تخلص متخصص واضاف راه يمكن ما خدامش كاع عندهم هاد السكانير.

طبعا حالة محمد لا تسمح لنقله والخوف ان يكون اصيب بجلطة دماغية خلى العائلة كتغوت. الطبيب ما مسوقش. العائلة سولات على سيارة اسعاف بعد اقناع كالو ليهم واخا خمسة الدقايق وتجي. تسنات العائلة اكثر من 15 دقيقة عاد جات، يعني الامل في انقاد ارواح مع لمغاربة الى عولنا على لامبلانص مشينا خلى ومات اللي مات.

وصلات سيارة الاسعاف لمستعجلات مصحة قطع ولد عائشة. هناك كان اللا مبالاة اكثر. اطباء وفراملية شي عندهم شي لحية صغيورة كيشربو اتاي. حتى نوضة ما ناضوش . دخل محمد فالباياص وبقى فوقو. حتى واحد ما قرب ليه ولا شافو ولا قدم ليه شي مساعدة. ايلى جا على سكانير راه ما خدامش؟ هاد الشي اللي خسروه هاديك العينة من الكائنات اللي ما فقلبهم لا شفقة ولا رحمة وكيكولو على ريوسهم اطباء.

اللي كان عندو لابلانص واللي ما مجهزة بوالو من غير البايانص وشي اوكسجين دخل فاتصالات مع كلينيكات. وحتى اطباء مصحة الضمان الاجتماعي بداو كيقتارحو مصحات. التبزنيز والوضاعة واللعب بارواح المغاربة.

العائلة رفضت اخذه الى مصحة. ما عندها فلوس وفقيرة. فضلات اكبر مستعجلات فالمغرب مستعجلات ميريزكو بحي “ليزوبيطو” بالبيضاء. هنا كان اكتشاف فندق لغير الادميين لا يدخله الا الادميين.

حوالي العاشرة والنصف ليلا وصلت سيارة الاسعاف ومازال محمد تضيف مصادر “كود” يتالم ويتقيي وفي شبه غيبوبة ووليداتو الصغار بجوج مخلوعين ومراتو اللي ما كتعرفش العربية تالفة واختو تبكي. فمستعجلات ميريزكو كلشي مقزز. الناس مليوحين مراض قدام الباب وحتى باش تفوت الحراس اللي كيحبسو غير اللي ما عجبتهمش كاين واحد الراجل راكد فوق مانطة وحداه قرعة الما ورجلو مضروبة =شوفو الفيديو والصورة =

دخل عند الطبيبة وكانت فوضى اخرى. يستحيل طبيب فالعالم يخدم فظروف بحال هاديك. دايرين بها الناس ومعاها شي وحدين كيهدرو بالغوت والصداع على برا وواحد السيد مشى بعيد وسط المستعجلات داير البيرسوز وكيتقب فالحايط مع لحداش الليل.

بعد فحص الطبيبة لاول مرة واخا مشى عند اطباء الضمان الاجتماعي كالت للعائلة باللي ما كتعتقدش عندو “جلطة دماغية”. رسلاتهم يديرو “الراديو” ديال الصدر. كلشي فوضى دخلوه لبلاصة سكانير الراس وجا واحد الطبيب كيتصرف بوضاعة وكيعتقد باللي هادوك اللي كاينين كلهم حيوانات وكيغوت اسمه بنموسى. خاصو التربية. فمدخل المستعجلات كاتبين بان الاستقبال الجيد اول طريقة للعلاج. واول ناس كيخرقوه هما هادوك اللي حاطيهم: بعض الاطباء والفراملية والحراس الخاصين. فهاديك المستعجلات كلشي خاسر. حارس ضارب مع مواطن وبدا السبان اللي تحت السمطة ووسط الجميع =شوفو الفيديو=

غادر محمد المستعجلات بخبر واحد انه غير مصاب بجلطة دماغية وطلب منه اجراء فحوصات اخرى لكن حالته تحسنت كثيرا وحالة مستعجلاتنا تخلفت كثيرا. فندق لبهايم فاي سوق اسبوعي اكثر تنظيم من اكبر مستعجلات البيضاء. تعكس عجزنا وتخلفنا واحتقارنا للمواطن ولادمتيه غير المحترمة. رشوى وابتزاز وفوضى وتكبر وتصرفات وضيعة. اللي مرض وما عندوش امكانيات باش يمصوه المصحات الخاصة. غير يموت فدارو احسن ما يمشي عند بحال هادوك