كود كازا ////

صرف سعيد حسبان، رئيس فريق الرجاء الرياضي، منح ديال 5000 درهم للاعبين ديال الرجاء، وهي منحة الفوز على فريق الجيش الملكي في الكلاسيكو برسم الجولة الثانية من الدوري الاحترافي لكرة القدم.

حسبان ولا كيحرص على أنه اعطي الاعبين المنح ديالهم في الوقت باش ابقى معاهم في الكلمة والاتفاق لداروه معاه، بحيث تافقوا على أنهم اصبروا عليه في المنح ديال الموسم الماضي، بالمقابل ابقى اعطيهم منح الموسم الحالي ديال المباريات في الوقت.

ومن بعد م صرف حسبان للاعبين منح التعادل أمام أولمبيك خريبكة وتقدر بـ 2300 درهم، صرف ليهم من بعد منحة الفوز على الجيش الملكي.

ودابا اللاعبين ديال الرجاء كيتسالو فقط منحة الفوز على الكوكب المراكشي برسم الجولة الثالثة، وهي المنحة لغادي اصرفها ليهم في الأسبوع الجاري أو المقبل على أبعد تقدير باش احافظ ليهم على المعنويات مرتفعة وشجعهم على أنهم ازيدو اربحو المباريات باش ابقاو في الصدارة ديال الترتيب بعد الفوز على فريق الكوكب المتصدر نهار السبت الماضي بأربعة أهداف لصفر.