كود الرباط//

علمت “گود” من مصدر مطلع ان سعد الدين العثماني الامين العام لحزب العدالة والتنمية، غايمشي اليوم يدير الحملة الانتخابية فمراكش، تزامنا مع الحرب الانتخابية اللي واقعة فهاد المدينة، خصوصا في ظل المنافسة الشرسة بين الاحرار والبام والبي جي دي على المقاعد البرلمانية فهاد الجهة النشيطة سياسيا وانتخابيا.

امين عام البي جي دي نازل باش يدعم لائحة المصباح فسياق قلق داخلي ومشاكل تنظيمية كبيرة كيعيشها الحزب محليا وجهويا ووطنيا، في المقابل المنافسين ديالو فحالة جيدة خصوصا الاحرار والبام.

زيارة العثماني لمراكش، جات بعد ايام قليلة من الزيارة للي دار عزيز اخنوش رئيس حزب التجمع الوطني للاحرار لهاد المدينة والتأثير القوي للي خلا فيها خصوصا مع الاستقطابات اللي دار فهاد الاستحقاقات واللي ابرزها يونس السليماني للي جابوه من البي جي دي وداروه وكيل لائحة الحمامة.

صراع كبير على مراكش، ثلاثة لاعبين رئيسيين هوما الاحرار والبي جي دي والبام، هاد الجهة غاتكون جهة الموت الانتخابي، خصوصا وان المهد ديال البام هو هاد المدينة، والبي جي دي كيجيب فيها اصوات، والاحرار استقطب فيها اعيان كبار ومنتخبين مؤثرين.