احمد الطيب كود ////

يستعد رشيد نيني اطلاق قناته المتنوعة “تيلي المغرب” من مدريد. هاد الشي ما غاديش يفوت شهرين وتكون خدامة. قناة نيني قناة عامة بالمغربية انتاجها بالمغرب وبثها بمدريد. القناة غادية تبث من قمر صناعي نايل سات من مدريد. هاد القناة كيف قال فحوار مع “تيل كيل” غادية تكون “مغربية تبث من اسبانيا” فهاد الحالة ما يصدعش راسو بالرخصة ومشاكلها باش تحصل على البث بالمغرب وللي مازال الهاكا ما عمرها بغات تعطي ترخيص لشي قناة خاصة.

الاخبار في هذه القناة غادية تكون العمود الفقري. فينما كان شي حدث غادية تكون تغطيتو ومناقشتو بحرية كبيرة. بالنسبة لنيني ما كاينش طابوهات ما كاينش محاصرين ما كاينش ممنوعين من التلفزيون كلشي يمكن يعبر على رآيو وفق طبعا خط تحريري حددته القناة. فما يمس الملكية والوحدة الترابية او الاسلام هادي واضح فيها بحال جريدتو “الاخبار”.

القناة فيها برامج مختلفة وفيها مواعيد اسبوعية منهم برامج صادمة بالمعنى الايجابي.

هاد القناة غاية تنجح حقاش مولاها ما عندوش فقاموسو الفشل. نجاحو ف”الاخبار” وقبلها “المساء” ماشي جا مجاني. جا حقاش كيخدم وكيخدم بزاف. خدام وهو فايق فالتران فالطونوبيلة فالطيارة مسافر مع دارو. ديما خدام كيفكر ويوجد ويصايب ويقاد ويجيب الجديد. هاد المشروع غادي يخلق زلزال فالمشهد السمعي البصري. دابا حتى واحد ما بقى محتاج لهاد الهاكا اللي لاسباب سياسية ما بغاتش تعطي قنوات ولكن مع هاد التقدم غادي يتجاوزها الزمن