هند لكلاوي كود فاس ///
البارح حطات طيارة خاصة بالمغرب جاية من اسبانيا وجابت معاهم عدد من حجاج الولي الصالح اسحاق ابو حصيرة نواحي ميدلت. هاد الطيارة ماشي بوحدها غير هي هازة ناس جايين من اسرائيل. جاو فرحلة عادية حتى لاسبانيا ومن بعد كراو دجيت بيريڤي ودخلو للمغرب.
واحد من هادو اللي جاو اسمو يوحنا حاييم وهو اللي كرا الطيارة وجاب صحابو. كان احتفال ونشاط قبل زيارة الولي الصالح. دار تصاور فهاد الولي.
قبل هاد الزيارة كان رئيس مجلس الجماعات الاسرائيلية بالمغرب سيرج بيرديگو دار بيان دعا فيه جميع اليهود بالمغرب بتجنب التجمعات واحترام التباعد والتدابير الوقائية اللي فرضاتها السلطات الصحية المغربية. واوضح البيان انو ما كاين حتى شي تجمع مسموح بيه. طبعا الفيديو والصور اللي عند كود كتبين العكس. كان النشاط وكان التجمع وما كانش التباعد.
وحسب مصادر ل”كود” فلحد الان لقاو 4 حالات كورونا فهاد الموسم.
بوريطة الوحيد المكلف بالترخيص لهاد الطيارات. هادا وزير الخارجية المغربي مخلي مغاربة عايشين فالمغرب حاصلين برا وكيعطي للي عندهم لفلوس يدخلو للبلاد فدجيت بريڤي. فضيحة كبيرة وبزاف