كود-بروكسيل//
طالب وكيل الملك اليوم ف بروكسيل بعقوبة حبسية ديال اربع سنوات ضد محمد عبد السلام اخ صلاح عبد السلام اللي مشدود بسبب الارهاب اللي ضرب فرنسا و بلجيكا فعام 2015 ، هاد الاخ اللي هو الكبير ف العائلة ماكفاهش المصايب اللي دارو خوتو اللي واحد منهم فجر راسو ف وسط قهوة ف فرنسا، ومشا خطط لعملية سرقة ديال الخزينة البلدية ديال مولنبيك اللي هو اصلا خدام فيها كموظف.
السيد اعترف بلي هو اللي دار السرقة مع جوج اشخاص معه وكان شابع ضحك ف المحكمة ..بحيث بحكم عملو عرف امتا كايمشي موظف يحط فلوس البلدية ف البنك وهما يتبعوه و سرقوه و المصيبة الكبيرة هو انه كايرفض لحد الساعة حتى يرجع المبلغ المسروق اللي هو تقريبا 20 الف يورو، و تحريات البوليس كتقول بلي غالبا تم تحويل المبلغ لشي حساب ف المغرب.
