كود الرباط //

طارق القاديري مول برشيد شاد في البزولة ديال المنصب لي كان فيه كأمين مجلس النواب وباغي الطوموبيل ديال البرلمان باش يتفطح بها على اولاد حريز.

الأخبار اللي جاية من كواليس حزب الاستقلال كتقول أن  القاديري هو وخوه باغين المنصب صحة او راه دايرين حملة شرسة باغين يديو فيها المكتب. حملة قوية داخل الفريق حيثاش مبغاوش يكون تجديد وتشبيب.

القادري بحال عبد الصمد قيوح، هادو عائلات باغين يتحكمو فالمناصب ويورثها منا والينا، لكن الرسالة ديال سيدنا للي دعا فيها لتخليق الحياة البرلمانية اللي واضحة مزال مفهموهاش أمثال القادري وقيوح وخديجة الزومي ونور الدين مضيان اللي دوزو 20 سنة تقريبا فرئاسة الفريق الاستقلالي.

القادري هو رئيس جماعة برشيد وبرلماني الإقليم نائب رئيس جمعية رؤساء الجماعات المحلية او دبا باغي منصب داخل المكتب، يبقا الأمين هو النائب.

القادري للي هرس التحالف الثلاثي أثناء تشكيل مجلس مدينة برشيد، ولي الفضائح ديالو حديث العام والخاص ولي تيبحث عن جمع المناصب مع غياب الإنجاز على مستوى الجماعة التي يرأسها ولي أن  التصميم التهيأة واقف بالإضافة إلى الاختلالات لي كيعرفها ملف الأراضي العارية.

هاد الشي ديال القادريات فيه بزاف ميتقال ومزال غادي نفصلو فيه.

يشار بلي سيدنا جدد الطلب ديالو لرشيد الطالبي العلمي دعاه إلى مواصلة العمل الجاد، بمعية كافة مكونات مجلس النواب، من أجل نهوض الغرفة الأولى للبرلمان، في انسجام مع مجلس المستشارين، بمهامها التشريعية والرقابية والتقييمية، على أكمل وجه، وتعزيز مساهمتها، بروح من المسؤولية العالية والتوافق البناء وتغليب الصالح العام، في تفعيل ما أطلقناه من إصلاحات مجتمعية، وتنموية كبرى، والدفاع عن المصالح والقضايا العادلة للوطن، وخدمة المواطنين، وتخليق الحياة البرلمانية، ترسيخا للثقة في المؤسسات المنتخبة‘‘.