سهام البارودي- كود//

لابغيتي تعرف شي مجتمع شنو كايسوى شوف المستوى لي كايعيشو فيه عيالاتو و لا بغيتي طلّع النيفو ديال شي مجتمع خاصك طلّع النيڤو للمرا ! شكون قال هاد الحكمة ؟ أنا و بلا منّة ع الله !

المرا نهار كاتقرا و تكون واعية و عندها الاستقلالية المادية، ماكاتبقاش تقبل بأي راجل كيف ماكان، لا حتى هي كاتولي كاتشرّط و خاصها الراجل يكون زوين و قاري وواعي و خدام و كايتريني و عندو مدخول مزيان و كاتولي تشهّى خاصو يكون طويل و اسمر و عندو ليزابدو و كايعرف يضحكني … و مع الوعي و الاستقلالية المادية كاتجي حتى الثقافة الجنسية و كاتولي تاهي عارفة ما لها و ما عليها ! و تقدر تقوليك واش فيدّيك و لا مافيدّيكش ! و تشرط عليك تشوف الطبيب لاكان عندك شي مشكل و تسوسك لابنتي ليها مابغيتيش تشد طريق الله !

هاد الترف للأسف ماعندش گاع العيالات فالمغرب و خصوصا العيالات لي مافراس مالهم لا قراية لا خدمة و ماعندعمش آفاق من غير شي ولد الناس يجي يعتقها من دارهم ! هادو الاغلبية الساحقة كاتلقاها مايمكنش ليها تتشرط، الراجل لي جا مرحبا بيه كيف ماكان غادي تقبل بيه! زوين خايب، نقي موسخ، قاري جاهل، حازق او لاباس عليه، كاتولي تقوليك غير الله يعطيني شي نقرة فين يغبر نحاسي و فاللخر كاتصدق هي نحاس و راجلها انحس منها و كايعطيها الله غبارة فين تغبر هي وياه.

هاد السهولة باش كايتجوجو المغاربة راه ماكاتخليهمش يزيدو لقدّام بسرعة ! حيت مادام اي واحد ممكن يتجوج واخا يساهم غير بالعضو التناسلي ديالو راه ماعمرنا نزيدو لقدام ! هاد السهولة هي لي كاتخلي المجرمين يتكاثرو و الحماق يتكاثرو و الجهال و الجاهلات و المكلخين و المكلخات كايتكاثرو بشكل مهول حيت ماكاينش شروط ! هيام سطار مثلا مريضة نفسيا و هاكاك والدة ثلاتة د الاولاد من ثلاتة د الآباء مختلفين و مازال تزيد الرابع لاجابتو الوقت !

راه دابا باش تضبر فخدمة بثلتالاف درهم للشهر يا الله تقدك تمشي بيها للحمام و تخلص لابونمون ديال التيليفون خاصك تدفع السيڤي و تدوز لونتروتيان و شوف تشوف واش يقبلوك فمابالوكاا فمااابالوكااا بالجواج … لي خاصو يكون اصعب حاجة يمكن يديروها جوج د الاشخاص !

هادشي علاش خاص العيالات يقراو و يخدمو و يكونو مستقلات ماديا، حيت من غير مسألة انهم كايحميو راسهم و كايبنيو مستقبلهم و كاتولي عندهم شخصية، راه كايرونديو سيرڤيس كبير للمجتمع ! حيت كلما قرات المرا و ترقات ووعات و خدات تجربة فالحياة، كلما كايوليو عندها شروط فالراجل لي غاترتابط بيه و ماكاتوليش تقبل بمن هب و دب ! و هادشي كايخلي الراجل يضرب على عرّامو حتى هوا و يخدم على راسو باش يكون فالمستوى ! لي ماقاريش يقرى و لي خايب يزيان و لي عندو شي مرض نفسي يعالجو و شي فقير يدير لاباس باش يجيب المرا و يلقى لي غاتدّيها فيه !

خاصنا نساليو مع العصر ديال مسكين تجوج مسكينة و نشرگو دينمها ديك الورقة و نبداو صفحة جديدة، العنوان ديالها هوا واعر تجوج واعرة و قاري تجوج قارية و لاباس عليه تجوج لاباس عليها و الجواج مايبقاش متاح للجميع !