كود سبور//

صرح المهدي النفتي مدرب الوداد الرياضي لـ”كود” أنه هو المسؤول على اختيار اللاعبين اللي كيلعبو ليماتش ديال الفريق واللي كيكونو احتياطيين واللي ما كيتكونفوكاوش، ومن بينهم محمد أوناجم اللي خرج من ستاد دونور ومشى فسيارة قبل ما يبدأ الماتش ديال الفتح الرياضي.

وأكد مدرب الوداد المهدي النفتي فتصريحو لـ”كود”، أن غياب محمد أوناجم على الماتش ديال الوداد ضد الفتح وعدم الحضور ديالو فمقاعد البدلاء هو من الاختيار ديالو كمدرب للفريق، وأنه ماكونفوكاش اللاعب فالماتش باختيار تكتيكي منو، حيث بان ليه ما واجدش باش يلعب.

وشدد المهدي النفتي وقال: “راه الغياب ديال أوناجم هو اختيار تكتيكي ديالي أنا، وراني مجبر ندير هاد الاختيارات وسيف الدين بوهرة كان واجد على أوناجم،  وراني كنوجد الوداد ديالي أنا كالمهدي النفتي، الوداد ديال الحاضر والمستقبل، وراه ملي كيربح الفريق راه بفضل اللاعبين وملي ما كيربحش راه المدرب اللي غالط”.