كود سبور//

عمّر المغرب ما كان مع قطع العلاقات مع دول الجوار فگاع المجالات ومنها المجال الرياضي، ومن بينها الجزائر، واخا حماق السلاسل ديال حكامها اللي عندهم عقدة كبيرة ودغينة تجاه المغرب وآخرها الحالة اللي دارو بسبب توني نهضة بركان اللي حجزو عليه فالمطار حيث فيه خريطة المغرب فخرق سافر للقانون، وهذا الشي اللي تسبب فأن ماتش الفريق المغربي امام اتحاد العاصمة ضمن ذهاب كاس الكونفدرالية الإفريقية يلغى بقرار من الكاف.

المغرب كان ديما كيأكد على حسن الجوار مع الجيران ديالو، وتكون علاقاتو مزيانة معهم ومن بينهم الجزائر وهذا الشي ديما كيأكد عليه الملك محمد السادس فالخطاب الملكي، وبانت مرة اخرى النية الحسنة للمملكة المغربية تجاه الجارة الشرقية، واخا الكابرانات تعداو على نهضة بركان وحجزو له على التونيات ديالو حيث فيه خريطة المغرب، ولكن الرباط ديما هازين النيفو وبزاف ولاعبين كبير، وكيتجاوزو وكيميكو على لعب الدراري ديال الكابرانات،

والدليل على هذا الشي أنه اليوم الاربعاء كان حاضر حسن الفيلالي عضو الجامعة الملكية المغربية لكرة القدم فالجزائر العاصمة، خلال اجتماع للمكتب التنفيذي لاتحاد شمال إفريقيا تدار فمقر الاتحاد الجزائري لكرة القدم كممثل للمغرب فهاد الاجتماع، وهذا الشي كيأكد ان المغرب ما كيخلطش الأمور، وما كيخربقش ما بين السياسة والرياضة فالمواقف ديالو، عكس سلطات العسكر الجزائري، اللي كتحاول ديما تستغل اي حدث رياضي منظم عندها فالجزائر بمشاركة نادي او منتخب مغربي باش تدخل شي فشي وتبين حقدها تجاه المملكة المغربية.