محمد سقراط كود ====

الحكومة الإسلامية لي نعم بيها الله على المغرب، وتحت قيادة الروك ستار سي بنكيران، عرف المغرب خلالها العديد من الأحداث والتغيرات المميزة، من بيتها ارتفاع استهلاك المغاربة للخمور، معرفتش واش كيشرب بنادم بالفقصة أو من أجل الإحتفال، كما عرفت الإنسحاب من تنظيم كأس افريقيا لي قرن وزمارة وحنا باغين نظموه، بالإظافة الى ظهور نجوم جدد يليقون بالمرحلة كالشيخ سار.. ومول الكاسكيطة.. مول نظاظر.. شباط ..لشكر … سيينا

هاد النخب الجديدة سواء الثقافية أو السياسية أو الفنية هي انعكاس للرقي والوعي الكبير لي كيعرفوا المغرب تحت ظل حكومة الإسلاميين، وحاليا طغى خبر وقوع وزيرين في الحب وحتى هادي راه احدى ايجابيات الحكومة الإسلامية لي كانوا كيخلعونا اليساريين منها وكيصوروها لينا كغول متشدد سيعود بالمغرب للقرون الوسطى.

الحوب شي حاجة زوينة كتعطيك الدافع للإبداع للخلق لإجادة العمل وكيحيد الكآبة والضغط، والفرد المحب راه كيعطي فخدمتو مزيان حيث كيكون مرتاح ومستقر، وكيحس بأن كاين شي حاجة فهاد الوجود كتستحق يفيق على ودها الواحد فالصباح، وملي قريت خبر وقوع وزير ووزيرة مغاربة فالحوب فرحت الصراحة، وقلت دابا غادي يوليو يخدمو المصالح ديالنا بحوب وبإخلاص وتفاني، ومادمنا تحت ظل حكم حكومة محبة ومحبوبة فراه لا خوف علينا.

ولكن عاوتاني ريحت مع راسي وقلت علاش فأغلب الإشاعات أو الفضائح لي كتخرج على سياسيين غربيين كيسميو فالغالب الأمر بعلاقة جنسية أو فضيحة جنسية، بحال فضيحة بيل كلينتون والميلف العظيمة مونيكا لوينسكي لي ولات مقدمة أحد أشهر البرامج فماريكان، ولكن هاد قضية علاقة حوب عمري سمعتها، كنسمع علاقة وصافي ومكيبقاش يدخل بنادم راسو وسطها باش يحدد نوعها أو ماهيتها واش علاقة حب أو جنس أو سادية مازوشية أو مصلحية، أنهم فعلاقة يكفي باش نعرفوا أنهم كيخرجوا مع بعضياتهم أنهم كيتلاقاو بزاف، ولكن باش يتدخلوا الآخرين من أجل تلطيف أو تصنيف العلاقة، لعلاقة حوب، أو شيئ آخر فهذا فعل مغربي خاص، حيث حنا عباقرة فتلطيف الواقع، ولكن الصراحة غي باش تكون علاقة حب بين وزيرين فراه سابقة من نوعها، واحدى عجائب حكومة قال الله قال الرسول، المنظافة لعجائبها العديدة.

مكرهناش هاد الحوب شي دخل للحكومة عبر وزرائها يدخل حتى للمعارضة ويحب لشكر شباط ،( ماتفهمونيش غلط)، راه الحوب ماشي بالضرورة شرط يكون بين الأنثى والذكر راه يمكن يكون حتى بين الإنسان والحيوان وبين الذكر والطكر والأنثى والأنثى والأباء والأبناء والحكومة والشعب

والحمد الله لنا في الملك أجمل صورة لحب الراعي لرعيته وحب رعيته له أطال الله بقائهما بجوج وأدام حبهما لبعضهما، وماشي بالضرورة كما روجت بعض الصحف أن الحوب خاصو يتسالى بالزواج أو يأدي ليه، راه يمكن يكون حب بلا زواج، كيما حاصل حاليا بين الوزيرين وحتى إلى مأداش للزواج يمكن على الأقل يأدي للكونكوبيناج ( المساكنة)، وهكذا يمكن يقدموا صورة حداثية للحكومة المغربية بالنسبة للخارج، ونبانو كول وسط ظاهرة التشدد الطاغية حاليا فعدة بلدان اسلامية