كود الرباط//
إدريس لشكر، الكاتب الأول لحزب الاتحاد الاشتراكي، حالف يمرمد سمعة الحزب فالارض، واخر حاجة دارها حط لدو لحسن لشكر وكيل لائحة الاتحاد فدائرة اليوسفية بالرباط.
اليوم رسميا ولد لشكر اللي اسمو احمد وكيشتغل مدير ديوان وزير العدل محمد بنعبد القادر، وكيل لائحة الحزب فالانتخابات الجماعية.
اييه دائرة اليوسفية، اللي كان كيترشح فيها ادريس للبرلمان، هاد الدائرة نفسها غايحط فيها ادريس ولدو. طبعا “كود” عرفات هادشي قبل وكولشي فراسو من المنتخبين ورجال اعمال والسلطة تاهي فراسها ولد لشكر غايترشح. هادشي خلا عدد من الوجوه الاتحادية تنسحب.
لشكر فاش مقدرش يشد منصب وزير العدل بسبب فيثو دارو عليه بنكيران وموراه العثماني، حط ولدو مدير ديوان محمد بنعبد القادر وزير العدل الحالي، ديك الساعة لشكر قال بلي :”جود ابني بديوان بنعبدالقادر لا علاقة له بـ”الزبونية الحزبية””، اوا اليوم شنو غايقول لشكر للرأي العام.
هادي اكبر شوهة لحزب عبد الرحيم بوعبيد، ولحزب قدم الكثير للديمقراطية فالبلاد. طبعا ملي شد لشكر الحزب كولشي باين فين غادي. وفق مصادر داخل الحزب.
مصادر داخل الاتحاد قالت لـ”كود” :”لشكر دار وعود واتفاقات مع عدد المسؤولين الجهويين والاقليميين، الغاضبين فحال جهة سوس دار معهم صفقة، واخا هكاك مكيثيقوش فيه، واخا اتفق يرشحو حسناء ابو زيد وكيلة لائحة للبرلمان”.
وأضافت ذات المصادر :”بلاصت مايجيب كفاءات ويرشح مناضلين، هاد لشكر كيبقا يدير تصرفات ميمكنش نقبلوها ابدا وخصوصا ان المغرب بعدما نجح في تدبير الجائحة خصوصا مسؤولين حزبيين وسياسيين قادرين يواكبو المرحلة، وطبعا ماشي فحال امثال لشكر”.
