سهام البارودي- كود//

الأمير هشام العلوي عطا محاضرة فمعهد الدراسات السياسية (صيونص بو) فباريس نهار الاربعاء.
المحاضرة كانت عامرة و حضرو ليها بزاف ديال الطلبة لي تفاعلو بشكل ايجابي بزاف مع الأمير هشام أو الدكتور العلوي كيما كايقدّم راسو و كايقدّموه المنظّمين ديال المحاضرة.

الأمير قدّم عرض قصير و لكن شبعان بالمعلومات، العنوان ديال المحاضرة كان هوا دور السياسة فالتقدم الاقتصادي فمنطقة الشرق الاوسط !
الأمير دار مقارنة بين الانظمة فالخليج و الانظمة فشمال افريقيا و خرج بخلاصة أنه بجوجهم ماصادقينش  لا لي عندهم فلوس البيترول لا لي ماعندهمش فحال مصر مثلا و ماغاديش  يمشيو بعيد حيت واخا فالواجهة كايبان بلي كاين تقدم اقتصادي و لكن مادامت الانظمة السياسية اوطوقراطية فراه داكشي كايبقا غي عكر فوق الخنونة حيت فالأصل دوك الانظمة ماباغينش يساهمو فتطور واحد الطبقة متوسطة لي تكون قوية و تقدر دير عليهم شي ثورات فحال لي وقع فالربيع العربي.
بالنسبة للمغرب الأمير هشام كايشوف بلادنا على اساس انها نقطة ضوء فالمنطقة “ذا برايت سبوت” كيما وصفها ولكن باش تزيد البلاد اقتصاديا القدام خاص التعاقد السياسي لي كاين بين الشعب و النظام يتبدل ( الملكية البرلمانية) و النخبة السياسية تكون عندها المصداقية لي ماعندهاش دابا.
فالجانب الانساني الأمير كيما العادة بان انسان متواضع و ضحوكي و فاش بداو كايهضرو على نهاية الاقتصاد المبني على البيترول ف2050 قاليهم ماعرفتش واش غانكون عايش فداك الوقت ! راه ديجا دابا عندي مشكل ديال السمع خاصني نبدل لاباراي ! واحد الدكتور من الجامعة فاش سالا الأمير المحاضرة شكرو على العرض ديالو و قاليه بلي قليل الناس لي كايهضرو على الوضعية الاقتصادية و السياسية فمنطقة الشرق الاوسط بلا مايجبدو الاسلام و الاسلاميين !

من بعد فاش غايبدى النقاش غايقوليه الأمير بلي الاسلاميين كايستعملوهم الانظمة كبعبع ! قدام الدول الغربية باش يقولو ليهم هانتوما شوفونا خدامين معاكم لامشينا حنا راه هاد اللحايا غايطلعو يقربلوها عليكم و نفس الهضرة كاتوجه للشعب ” هانتوما شوفو ! نهار يطلعو عليكم هاد الاسلاميين راه ياكلوكم اللهم خليونا حنا محافظين ليكم على الاستقرار و الامن و شوية د الحرية.

الأمير أدان الاعمال لي كاتقوم بيها اسرائيل فغزة مؤخرا و هادشي خلا شي طلبة يصفقو عليه.