سهام البارودي- كود//

واحد الجملة كايعاودوها السلفيين و الاتباع ديالهم و گاع هادوك لي كايعجبهم المرا تبقى ديما تحت السباط ” آ سيدي المرا تجلس فدارها فحال الملكة و راجلها كايجيب ليها كلشي حتى لعندها ” هههه ! كلشي ؟! فحالا حنا ماعايشينش فالمغرب و ماعارفينهاش باش مسكّية ! راجلها هوا الشيخ تميم غايجيب ليها كلشي ! الأمير حمد ! راجلها بوڤري درويش حتى هوا كايتقاتل مع الحياة فحال نسبة كبيرة ديال المغاربة ! ماجاب تال راسو بقا غايجيب ليها هي !

فاش كايقولو هاد الجملة كايبغيو يلعبو على داك الوتر ديال العگز لي فالانسان عموما و فالعيالات خصوصا و خصوصا العيالات لي كايكبرو فمجتمعات فحال ديالنا ! زعما هانتي بلا ماتقراي بلا مادوزي امتحانات بلا ماتفقصي على شي نقط و بلا ماتخدمي نتي غا تجوجي بالراجل و هوا غايدير ليك كلشي ! آ البعابع لي غايدير ليك !

و الله يا بنيتي و مادرتي لراسك لادار ليك شي احد ! قوالبية نتي زعما باغا تجيبي الدورة على الطبيبات و المهندسات و المحاميات و سيدات الاعمال و تولي فحالك فحالهم و تعيشو فالنيڤو ديالهم بلا ماديري حتى ادنى مجهود من غير انك تدخلي فعلاقة زوجية بالعضو ديالك التناسلي كراس المال ! يصحابك الحياة ساهلة ! البعابع

قرون و قرون و العيالات جالسات فالدار فالمغرب آش قضاو ؟! والو ! بقاو محرومين من القراية و الخدمة و الاستقلالية المادية كايعيشو تحت سباط الراجل مكرفصات، شفنا منهم شي عالمة ؟ لا  ، شي سيدة اعمال عاونها راجلها تراكم الثروة ؟ لا ! كايعيشو و يموتو ترّاسات و داكشي علاش هوما نيت اليوم لي كايشجعو بناتهم باش يقراو و يخدمو باش مايطيحوش فنفس الفخ لي طاحو فيه الامهات.

“جلسي فدارك و راجلك غايجيب ليك كلشي” زعما الحياة هي داك كيلو د البطاطا و نص كيلو د البصلة و قرعة د الموناضا هادا هوا كلشي ! طز يا ودي طز

أغلب ربات البيوت فالمغرب ماعندهم حياة مساكن، كاتعيش حياتها كاملة مدفونة وسط الحيوط و السدادر و الكوزينة و الكوكوط، بلا مانهضرو على الحرب النفسية لي كاتعيشها مع الراجل و عائلة الراجل و مّو و خواتاتو، و قالت ليا مّك و عايراتني اختك و شوف مرت خوك ضربات ولدي … هادي هي حياة اغلب ربّات البيوت فالمغرب ! “ابراهيم عطيني فلوس نجيب جلابتي” “براهيم عافاك لاما خلي ليا معاك شي سطاشرميا باغا نشري بيجامة” ” براهيم بغيت نمشي عد مّي” …. خاصها تبقى تطلب و تزاوگ و شوف تشوف العذاب آولد عمي! بلا مانهضرو على العذاب النفسي و الجنسي لاطاحت فشي راجل شبعان مشاكل جنسية و طبعا حنا عندنا بزاف ديال الرجال ماكايرضاوش يعتارفو بالمشاكل ديالهم الجنسية كاينوض يلصقها فالمرا ! و النفسية ديالها كي كاتكون حيت ديما معصبة ديما مفقوصة ديما عندها مشاكل…

فاللخر شنو كايشيط ليها ؟! كايشيط ليها شي مرض، شي سرطان، شي داء السكري حيت كاتعيش حياتها كاملة كاضرب فالخبازات و المروق و الگوامل لا رياضة لا ماكلة نقية و كاتربي الترمة و كاتزيد فاحصائيات السمنة و مع كاتلبس الجلالب و الحوايج واسعين ماكاتعرفش بلي راها مريضة بالسمنة عاد زيد تامارة و الحرب النفسية مع الراجل و عائلتو و فاللخر كاتشرف و كاتبقا طلاوط من دار لدار حتى كاتموت !

ماشافت ماتشوفات ! ماسافرات، ماتبرعات، مانعسات مزيان ماكلات مزيان ماناكت مزيان، مالبسات مزيان، ماعاشت تجارب غنية فالحياة …. كاتعيش و كاتموت بلا ماتعيش حياتها !

و بولحية مصّر يشكر لينا المباتة فالحبس.