محمد سقراط كود====

الأعداء ديال لمغاربة معروفين ، الحزقة، الفقر، قلة شي، المحسوبية، الحكرة، انعدام الفرص، الغلاء، انعدام الأمن، الكرا، الضو ولما،الكريدي،العين، الحسد ، الحضية، التابعة، السبيطار، الفارماسيان، الإدارة، الفيادر ديال ليبواط،…..ألخ.

فهاد الأعداء ديال لمغاربة مكايناش للجزائر أو نظامها، المغربي لي مقاتل مع الوقت مكيحسش بأن النظام الجزائري كيشكليه تهديد على قوته اليومي أكثر من داك المخازني لي كيلقاه فالسويقة كيجري عليه وكياخدليه الميزان، كذلك المغربي لي بيخير عليه نهار كيبغي يدير شي مشروع راه كيكون العدو ديالو هي البيروقراطية فالإدارة المغربية والمحسوبية والزبونية والرشوة ماشي النظام الجزائري أو الدزايريين، كذلك المغربية لي كتموت وهي كتولد فباب شي سبيطار راه ماشي الجزائر لي قتلاتها، ولكن الإعلام المغربي باغي يخلق لينا عدو صحة ولو وهمي، مكفاوهش هاد الكم الهائل لي عندنا من الأعداء لي متربصين بينا بشكل فردي، باغي يخلق لينا عدو مشترك جماعي، مجتمعون نحن عن بكرة أبينا في كرهه، وخاص نعيشو على وهم أنه يحاربونا ولا يتوانى للحظة في التنكيل بينا أن توفرت له الفرصة.

فالغالب مكنقراش الجرائد، ماشي لأنها تافهة أو مافيها تاجديد، وإنما حيث أنا لي تافه وحيث أنا لي مكنقراش مكلخ ممهتمش بما يدور، بالإظافة إلى أن موقع كود والفايسبوك كنلقى فيهم داكشي لي محتاج ولي رايج فالسوق، وليوم تصادف أنني تواجدت فالقهوة ولقيت الجورنالات فابور، قريتليا ما تيسر وهالني نوع العناوين لي مفتاتحين بيها الجرائد، الشرطة الجزائرية تحول جمهور الراجا لمعطوبي حرب، صورة الداودية فرحانة التي نوضات ضجة لأنها التقطتها في الوقت لي كانو فيه شرطة القمع الجزائري كتسلخ فجمهور الراجا، أواه … آش هاد لعجب، واش حنا فحرب ومافخبارناش، واش تحولنا لمصريين عن غفلة منا بلا منعيقو، وعلاش الجزائر بالظبط، راه جماهير الفرق المغربية عيات تاكل لعصا فعدة دول أخرى بحال تونس ومصر، علاش متصدرش الأمر عناوين الصحف بهاد الطريقة.

كلنا يذكر الصراع المصري الجزائري وكيفاش نفخو فيه اعلاميين الكيلو المصريين، وكيفاش نساقوا المصريين ورا ديك الهدرة، وخرجوا فنانين كانوا محترمين حتى هوما بتصريحات همجية ضد الإخوة الجزائريين، وطبعا أغلب المغاربة كانو مع المنتخب الجزائري، وحتى الى كان جمهور الجزائر اعتدى على المصريين فالعديد منا عجبوا الحال لأنهم بينو ليهم الرجولة ديال شمال افريقيا، والعديد منا كره وحتاقر داك التضحي لي دارو المصريين وداك لبكا ديال لعيالات، ولكن هاحنا فجأة ولينا بحالهم، وإعلامنا نسا راسو وتحول لتجمع ندابات، ونساقوا العديد وراء هاد الحملة العشواء من التذلل والمسكنة والتضحي، آش أودي هاد لعجب.

جمهور الكورة لي كلا ديال لعصا من عند البوليس ديال المغرب نيت عمرو ياكلها من عند شي بوليس براني واخا من دابا ألفين عام، ياك ديما الدراري مضروبين وبايتين فالكوميساريات ومشدودين فالحباسات، هادشي عادي مكيهدر عليه حد، مكيتصدرش واجهات الصحف، الشرطة المغربية تحول جمهور الجيش الملكي أو الراجا أو الوداد أو الكوكاب لمعطوبي حرب، لبارح نيت جمهور اتحاد طنجة والجمعيةو السلاوية حيحو ودكدكو وهرسو، وتدخل المخزن وتشد بنادم ، وكأن شيئا لم يكن في صحفنا أو برامجنا، مقابلين غي أنقذونا انهم يقتلوننا في الجزائر، فيناهي المهنية والإحترافية والموضوعية، طريقة التعاطي مع الأمر كانت هيستيرية وبدات من قبل الماتش، وبانو حتى حنا عندنا نجوم إعلاميين محرضين، حتى حنا بغا يخرج لينا عمرو أديب من بين جناباتنا( شكرا أيوب بوضاض)، واخا المغرب راه لا يقبل هاد الأشكال لي سخن عليه كيسيفطوه لخريزو حتى يبرد ويخرجوه مقاد ورايم الحيط مع خوتو.

الإعلام مهمتو نقل الخبر ماشي تجييش أمة على قدها ضد أمة أخرى من أجل ماتش ديال الكروة، المغاربة مامستاعدينش يكرهو شي ناس خريين من غير بعضياتهم، والمغاربة مامستاعدينش ينظاف ليهم عدو آخر على الأعداء لي عندهم، باركة غي الحزقة تزيدونا حتى الدزاير.