نجوى المالحي-كود//

من بعد اللغط لي ناض عليها بسبب تعبيرها على ضرورة احترام الاختلاف في الآراء والبعد على التعصب في الأفكار لي كيضر غير صاحبو، رجعات ايمان باطمة باش تزيد توضح كلامها كثر.

بنت باطمة الصغيرة  لي ديما خالقة الجدل بافكار بحال ان الارض مسطحة وكورونا غير اشاعة، وضحات شنو بغات تقصد، وقالت أن الاختلاف في الدين ما عندو حتى علاقة بداكشي لي قصدات.

إيمان باطمة، قالت انها عندها صحابها ماشي مسلمين وعلاقتها بيهم مزيانة، كتحترمهم وكيحترموها ولكن هادشي ما يخلي حتى واحد يهين الدين ديالها كمسلمة ويقولو ليها الإسلام كذبة فقط، يعني باطمة مكتحتارمش اراء الاخرين، خاصها غير الاخرين لي يحتارمو اراءها.

وفي انتقاض تام مع هدرتها، كانت قالت إيمان :”نهار انتعلمو نحتارمو اختلاف الأفكار لي بيناتنا غادي نزيدو القدام، لكن بما أننا مازالين هاكة عمرنا نطفروه. خاصكم تعرفو أن الناس لي مختالفين عارفين نفس الافكار لي نتما عارفين، غير ملي ماقتانعش مشا زاد قلب واقتانع كثر بأجوبة منطقية”.