عبد اللطيف اگنوش٬ استاذ باحث في جامعة الحسن الاول سطات .//////

التعليق ديال ابن كيران على الحكم القضائي في قضية “قائد الدروة” نهار عيد الشغل، مادوزها ليه حد…عادي، لأن السيد “تدخل” في قضية
“رائجة أمام المحاكم” على حقاش باقا ماسالاتش وماهياش “حكم نهائي”…خاصة وأن السيد راه “رئيس حكومة سيدنا”، والدستور كاينص على فصل السلط، خاصة بين السلطة التنفيذية ديال سيدي ابن كيران، والسلطة القضائية..

مادوزهاش ليه وزير الداخلية خلال تدخلو في البرلمان، وقللز ليه من تحت الجلابة، وقال ليه بالمعنى: “ادخل سوق مخخك، السلطة القضائية بوحدها، وانتا بوحدك، واجمع راسك” !! هاذي مسألة عادية، لأن الداخلية عايقة بللي رئيس الحكومة كايبغي يبان “قريب من الشعب”، و”قريب من المكرردين” للي هوما طاراف في ذيك المصيبة ديال الدروة..وعايقة بيه بللي باغي غير الأصوات في الانتخابات ديال أكتوبر الماجي…
ولكن للي فاجأني شي شويا، هو ردة الفعل ديال “الأصالة والمعاصرة” البارح…

واحد القمقوم من “البام”، سمييتو “البيضي”، رئيس المجلس الإقليمي ديال برشيد، زغبو الله حتى هو، وبغا يقللد ليك سيدو ابن كيران..هز دوزانو، ومشا ليك لواحد السيدة “نائبة وكيل الملك بالمحكمة الابتدائية” ديال برشيد، وشبع فيها سبان وتهديد، غادي ندير ليك ماندير ليك، ما خلا فيها غير للي نسا…الخانز مشا للسيدة حتى للمحكمة، باش يضغط عليها في شي قضية كاتهمو…

هاذ المرة ماشي وزير الداخلية للي تدخل، لا…

باكم إلياس العماري براسو للي تدخخل…جمد لبوه جميع الأنشطة الحزبية ديالو، واستدعاه للمجلس التأديبي ديال “أخلاقيات الحزب”، ورسل رسالة “اعتذار” للسيد عبداللطيف الشنتوف، رئيس نادي قضاة المغرب، في المكتب الجهوي لاستئنافية سطات…آالعزززززززززز !!!

الميساج باين ياك؟ انتا بنكيران ماكاتحتارمش السلطة القضائية، واحنا “البام” ناس ديال المؤسسات، وكانحتارمو السلطة القضائية…هذا كايسمميوه الفرانساويين : “جواب السارح للسارحة” !!!