محمد سقراط-كود///
أكبر فيروس حقيقي كيهدد المجتمع حاليا هو هاد تجمع الامهات مولات الجلالب لي كيعتابرو ولادهم مجرد مراهقين عندهم خمسة وعشرين كيبررو ليهم أي جريمة كحلة دارو حيت معندهم عقل وهوما لي خدامين على واليديهم( واخا مابايناش فيهم)، هاد تجمع ربات البيوت لي عندهم كونطات فيوتوب بإسم أم ايمن ام أكرم أم البنات ولي مقابلات مدابزات مشاهير اليوتوب وكيجيو من جيهة فلانة ضد نسيبتها أو العكس، ولي ديما مطلعات حلقات مسلسل سامحيني فالطوندونس ولي كيسولو على وصفات لإسعاد الزوج عند عودته من العمل، ولي كيصاوبو داك الطبسيل كبير ديال شلاظة كلو ألوان بحال الرومبة ديال رياض تطوان الى كان غيدوز من حداها الملك فأيام زياراته الأولى لطنجة، وهوما لي كيصايبو الخبز فوق منو لاصوص وكيسميوها بيزا، هادو هوما لي كيتشد ولدهم داير شي كارثة وعوض يتحملو المسؤولية ويعتارفوا بأنهم فشلوا في التربية كيبداو يبررو أفعال ولادهم ويذكرو حسناتهم.