عفراء علوي محمدي- كود//

الفيلم المغربي “علي صوتك” ديال المخرج نبيل عيوش، ربح جائزة السينما الإيجابية، وهي جائزة تقديرية كتكرم الفيلم الأكثر إيجابية مابين الأفلام المشاركة ف المسابقة الرسمية لمهرجان كان السينمائي.

وربح نبيل عيوش الجائزة التكريمية ف حفل تنظم ف مدينة كان، بحضور بزاف ديال الشخصيات.

كيف حصل عيوش على “Best Achievement in Cinema” من طرف “Union-Life International يونيون لايف إنترناشيونال”، على المسار ديالو السينمائي الحافل بالإنجازات.

وفيلم “علي صوتك” كان أول فيلم مغربي يشارك ف”كان”، وتعرض الخميس فمسرح  Louis Lumière، بحضور الطاقم ديالو.

والفيلم كيعاود على “أنس”، وهو مغني راب سابق، خدم فمركز ثقافي فحي سيدي مومن فكازا، وبفضلو قدرو شباب يتعلمو فنون الشارع اللي لقاو فيها راحتهم، ويعبرو بيها على قضاياهم.

والفيلم من إخراج نبيل عيوش، وسيناريو عيوش كذلك بتعاون مع مريم نقاش ونهيلة عارف، وهو من انتاج  شركة Ali’N Production وLes Films du Nouveau Monde، بمشاركة Unité وAd Vitam.

ولكن “علي صوتك” ماربح حتى جائزة ضمن المسابقة الرسمية لمهرجان كان.