عفراء علوي محمدي- كود//
كشف إدريس شحتان، مدير موقع “شوف تيفي”، أن الصحافية فاطمة الزهراء رجمي تمكنات الآن من الهاتف ديالها، وهي الآن مع المحامي ديالها، و”كاين احتمال كبير بزاف تخرج فالدقائق الجاية، لكنها لحد الساعة مازال ماكملات إجراءات الخروج”.
وبشان ما تداولته بعض المواقع بخصوص متابعة رجمي بسبب جريمة سابقة ديال الضرب والجرح، وانه كاينة ضدها مذكرة بحث دولية، كيقول شحتان ل”كود”: هذشي ماكاينش، وانا اسمي هذ المواقع بإعلام الطابور الخامس، وهذشي ماعندوش علاقة بالحقيقة وغير من نسج الخيال ديالهم.
وتداولو أصدقاء وزملاء الصحافية، على مواقع التواصل الاجتماعي، ومنهم مقيمين بإسبانيا، خبر إطلاق سراحها قبل قليل، خصوصا بعدما بانت كونيكتي فالفايس هذي 20 دقيقة فحدود كتابة هذ الأسطر.
وتشدات اليوم صحافية “شوف تيفي”، اليوم الجمعة فسبتة، بعدما كانت كتغطي أحداث المغاربة اللي حركَو للمدينة المحتلة.
وكان كشف مدير “شوف تيفي”، فتصريح سابق ل”كود”، أن هذشي بسبب “تغطيتها لتجاوزات إسبانيا مع المهاجرين، وتلفظها بكلمة سبتة المحتلة”، كيف صرح انها كتحمل الجنسية الإسبانية، ومشات لتماك بشكل قانوني.