عفراء علوي محمدي- كود//

فرسالة ليه بصفتو مواطن مغربي، رد محمد صالح التامك، المندوب العام لإدارة السجون وإعادة الإدماج، على خرجات الأمين العام لمنظمة مراسلون بلا حدود، كريستوف دولوار، اللي جا للمغرب باش يشارك فوقفة احتجاجية تضامنا مع الصحافيين المعتقلين، عمر الراضي وسليمان الريسوني، لبارح الثلاثاء، تزامنا مع جلسة محاكمتو.

وقال التامك، فردو على دولوار اللي توصلات بيه “كود”: “عندو فتصريحاتو تحيز مغرض، بحال الى كان المعتقلين الريسوني والراضي مسجونين لأسباب أخرى غير تهم الاغتصاب والاختطاف، وهذشي فيه تجاهل تام لحقوق الأطراف الأخرى، مقابل التنسيق مع أشخاص من مجموعة معروفة بعدميتها”.

وشاف التامك ان فموقف دولوار هذا احتقار للعدالة المغربية، من خلال إعادة تصنيف القضية فخانة انتهاك حرية التعبير والصحافة، و”بهذشي كيبان أنه ماعندوش رؤية حقيقية على أن المملكة المغربية هي دولة ذات سيادة، كتتمتع بسلطة قضائية استقلاليتها مكفولة دستوريا”، حسب تعبيرو.

وتابع التامك: “كان خاصو يخلي تحيزو جانبا، ويتساءل علاش ختار يجي للمغرب باش يدافع على جوج صحافيين متورطين فقضايا أخلاقية، ومايردش على أشخاص بحال الراضي الليلي ومصطفى أديب وزكريا المومني، اللي كيدوزو فوسائل الإعلام الفرنسية باش يعطيو تصريحات مظلمة على المملكة؟”

وتساءل التامك، كيفاش لدولوار يسمح لراسو يعطي للمغرب الدروس الأخلاقية فمساءل الحريات وحقوق الإنسان، واخا هو عارف أن المنظمة اللي مترأسها عندها ماضي خايب فهذشي، وهي براسها محتاجة تقاد أخلاقيا.

وكان قال دولوار، فتصريحو للصحافة لبارح، أن المؤسسة الملكية هي الوحيدة القادرة على توقيف “كارثة إنسانية” من أجل حرية الصحافة، وتقدر “تحبس موت رجل”.

وزاد أن كل من الراضي والريسوني فحالة صحية حرجة تستدعي التدخل، خصوصا الأخير اللي وصل لليوم 76 ديال الإضراب على الطعام.