عفراء علوي محمدي- كود//

دارت جمعية مع المستهلكين، المنضوية تحت لواء الجامعة المغربية لحقوق المستهلك، تطبيق جديد على “الأندرويد” كيمكن المستخدمين من الإطلاع على قانون الحماية المستهلك 08.31، باش يعرفو حقوقهم خلال عملية التبضع ومايتقولبوش.

ودار هذ التطبيق المعنون ب “Loi marocaine pour la defense du consommateur” بمناسبة الذكرى العاشرة لصدور قانون حماية المستهلك، وفيه القانون باللغة الفرنسية فانتظار الترجمة ديالو من بعد، كيف ممكن يولي متاح حتى على هواتف iOS مستقبلا.

وكيمكن للمستهلكين يكتبو فمحرك البحث ديال التطبيق أي حاجة كيبحثو عليها، ويسهال عليهم من خلالها يلقاو الجواب من خلال فصول هذ القانون، وكيمكن للتطبيق كذلك يحيلهم على قوانين أخرى متعلقة بحماية المستهلك.

وبخصوص التطبيق، قال أحمد بيوض، رئيس جمعية مع المستهلكين، ان المستهلك المغربي عارف بللي كاينة قوانين، لكن ماعارفش كيفاش يقدر يولجها، وهذا هو الهدف من لابليكاسيون اللي كتسهل عليه الوصول إلى المعلومة.

وزاد بيوض، فتصريحو ل”كود”، ان التطبيق كحيل كذلك على القانون 24.09 المتعلق بضرورة وضع عنونة للمنتوجات وكعلها مقروءة وغير قابلة للإتلاف، و49.99 اللي كيحتم على المنتج يعطي الطريق اللي سلكها المنتوج قبل مايوصل عند المستهلك، و104.12 المتعلق بحرية الأسعار وشروطها، بالإضافة للقانون 28.07 المتعلق بوضع مكونات المنتوجات معلومات حولها، وغيرها.

وتكلم بيوض على دراسة كانت دارتها الجمعية قبل وضع التطبيق، واللي كتتعلق بالمواد المطبقة وغير المطبقة فالقانون 31.08، بحيث تبين أن غير 85 مادة اللي مطبقة كليا، و47 مامطبقاش كلها، و75 مادة مامطبقاش نهائيا.